“Jenubiy xitay seher pochtisi” gézitining muxbirliri Uyghurlar mesilisi tüpeylidin istépa bergen

“Xongkong erkin metbu'at” torining 24-öktebirdiki xewiride éytilishiche “Jenubiy xitay seher pochtisi” gézitining muxbirliridin ikkiylen özlirining üch ayliq tekshürüsh asasida teyyarlap chiqqan Uyghurlar heqqidiki tekshürüsh doklatini gézit tehrirati bikar qiliwetkenliktin öz xizmitidin istépa bergen.

Tokyo shehiridiki “Chet'el muxbirliri kulubi” da ötküzülgen axbarat élan qilish yighinida “Jenubiy xitay seher pochtisi” gézitining sabiq aliy muherriri, muxbir pétir langgan (Peter Langan) bu heqte melumat bergen. Uning éytishiche u we yene bir muxbir köpligen yazma höjjetler asasida teyyarlap chiqqan Uyghur diyaridiki pilanliq tughut siyasiti hemde uning tesiri heqqidiki üch qisimliq tekshürüsh doklati gézit tehrir bölümige tapshurulghandin kéyin “Tehrirlik we delillesh ölchemlirige uyghun kelmigen” dégen betnam bilen bikar qiliwétilgen. U bu heqte söz qilip: “Shinjang izchil axbarat sahesining diqqet merkizide bolup kéliwatidu. Yene kélip hazir köpligen doklatlar lagérlar we Uyghurlarning qirghin qilinishini merkezliship qaldi” dégen. Shundaqla mezkur gézit tehrir bölümining xitay hökümitini renjitip qoyushni xalimighanliqini ishare qilghan.

Xewerde éytilishiche, üch qisimliq bu doklatta xitay hökümitining pilanliq tughut siyasiti ijra qilin'ghan 17 yilda Uyghur diyaridiki nopus qurulmisida qandaq özgirishlerni peyda qilghanliqi tepsiliy sherhlen'gen. Doklatning asasliq matériyal menbesi xitay hökümitining sanliq melumatliri bolsimu “Pakitlar toluq emes” dégen bahane bilen élan qilinmighan. Melum bolushiche, “Jenubiy xitay seher pochtisi” gézitining bu xildiki “Merkiziy hökümetni renjitmeslik” xahishi ilgirimu birnechche qétim körülgen. “Jenubiy xitay seher pochtisi” géziti xongkongda in'gliz tilida neshr qilinidighan bolup, “Ali baba guruhi” 2015-yili 266 milyon amérika dollirigha uni sétiwalghanidi.