Гуаңдуңниң җәнҗяң шәһиридә пуқралар билән сақчилар тоқунушқан

Мухбиримиз әзиз
2017-08-03
Елхәт
Пикир
Share
Принт

Хитайниң гуаңдуң өлкиси җәнҗяң шәһиригә қарашлиқ сүйши наһийисидә давам қиливатқиниға бир айдин ашқан пуқраларниң наразилиқ намайиши бүгүн юқири пәллигә чиққан. Нәтиҗидә хитай қораллиқ сақчилири намайиш қилғучилар билән тиркишип онлиған кишини уруп яриландурған.

Радийомиз мухбирлириниң игилишичә, алақидар һөкүмәт әмәлдарлири билән тил бириктүрүвалған йәрлик зомигәрләр бирликтә бу наһийә тәвәсидә «шешин електр истансиси» намида қурулуш башлиған. Нәтиҗидә 700 мо йәргә селинмақчи болған қурулуш тәстиқ болмиған һәмдә алақидар рәсмийәтләр тамамланмиған әһвалда деһқанларниң терилғу йери, бақмичилиқ мәйдани қатарлиқларни игиливалған һәмдә төләм беришни рәт қилған.

Йәрдин айрилип қалған деһқанлар бүгүнгә қәдәр көп қетим наразилиқ намайиши қилған болсиму, һәрбийләрниң уруп-думбалиши билән тарқитиветилгән. Буниң билән бүгүнки 9-қетимлиқ зор тоқунуш келип чиққан.

Мәлум болушичә, хитай тәвәсидики һәрқайси җайларда бу хилдики наразилиқ намайиши көп йүз бәрсиму, «муқимлиқ» ни баһанә қилған хитай даирилири һәрқачан қораллиқ сақчилар һәмдә һәрбийләрни ишқа селиш арқилиқ бу хил намайишчиларни қоғлап кәлмәктә икән. Һалбуки, уйғурлар диярида болса бу хил наразилиқлар һәр заман қораллиқ бастурулуватқан болуп, анализчилар буни «хитай һакимийитиниң уйғурлар билән хитайларға икки хил өлчәм қоллиниш усулиниң әмили мисали» дәп көрситиду.

Пикирләр (0)
Share
Толуқ бәт