“зимистан” тори: “ичкири өлкиләрдә уйғурларни дост тутқан хитайларниң достини сақчиға мәлум қилиши тәләп қилиниду”

Мухбиримиз әркин
2019-11-15
Share

Италийәдики “зимистан” намлиқ кишилик һоқуқ тори 14‏-ноябир елан қилған бир хәвиридә ичкири өлкиләрдики хитайлар уйғурларни дост тутса достини йәрлик сақчи орунлириға мәлум қилип қоюши тәләп қилинидиғанлиқини билдүрди.

Хәвәрдә қәйт қилинишичә, хитайниң җяңши өлкисидики бир хитай тиҗарәтчи бир уйғур билән сода қилиш җәрянида тонушуп дост болуп қалған. Лекин бу достлуқ ваң йоң исимлик бу хитайға нурғун аваричилиқ елип кәлгән. Хәвәрдә уйғур аптоном райониниң сиртида турушлуқ мусулманларниң қаттиқ назарәт вә кәмситиш астида яшайдиғанлиқи, бу хил кәмситишниң “ашқунлуқни түгитиш” намида елип бериливатқанлиқи илгири сүрүлгән. 

Хәвәрдә қәйт қилинишичә, ваң йоң исимлик җяңшилиқ юқириқи хитай пуқраси бир қетим уйғур дости билән учришип, буни өзи турушлуқ орундики сақчи понкитиға хәвәр қилмиғанлиқи үчүн өзиниң тәқиб астиға елинғанлиқини билдүргән.

Лекин “зимистан” ториниң хәвиридә ваң йоңниң уйғур достиниң исми вә униң қайси юртлуқ икәнликини тилға елинмиған. Униң билдүрүшичә, ичкий өлкиләрдә “шинҗаңдин кәлгән кишиләр бирдәк террорчи” дәп қарилип, уларға хитайниң “террорлуққа қарши туруш қануни кәң иҗра қилинидикән.”

Ваң йоң өзиниң уйғурлар билән қәрәллик учришип туруши сақчиларниң диққитини қозғап, өзиниң агаһландурулғанлиқини билдүргән. Униң қәйт қилишичә, сақчилар униңға “уйғурлардин йирақ турушини, чүнки уларниң террорчи” икәнликини тәкитлигән. Лекин ваң йоң өзиниң бу агаһландурушқа қулақ салмиғанлиқини, сақчиниң шу сәвәблик өзигә 2000 йүән җәриманә қойғанлиқини билдүргән.

Ваң йоңниң қәйт қилишичә, нөвәттә ичкири өлкиләрдики уйғурларни өй иҗарә елип олтуруши мумкин әмәс икән. Хәвәрдә бу әһвалниң бу йил6‏-айда хенәндики пуяң шәһиридиму йүз бәргәнлики, он нәччә сақчиниң бу шәһәрдә өй иҗарә елип олтуруватқан бир уйғур әр-аялниң өйигә бастуруп кирип, уларни бу өйдин қоғлап чиқарғузивәткәнлики илгири сүрүлгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт