Xitayda téléfon kartisi kimlik tüzümi resmiy yolgha qoyuldi

Muxbirimiz méhriban
2015-09-01
Share

Xitayning junggo xewerler tori téléfon kartisi kimlik tüzümining 1-séntebir seyshenbe künidin bashlap resmiy yolgha qoyulghanliqini xewer qildi.

Xewerde déyilishiche, herqaysi jaylardiki xitay télégraf idariliri 1-séntebirdin bashlap téléfon kartisi sétiwalghuchilarning 2-ewlad kimlikini élip kélip tizimlitip téléfon nomuri élishini yolgha qoyghan.

Xewerde déyilishiche, nöwette xitayda yenila birqisim téléfon shirketliri we erkin bazarlarda kimliki tizimlanmaydighan téléfon simkartlirini sétish dawamlishiwatqan bolup, ilgiriki kimliki tizimlanmighan téléfon simkartlirini biraqla bikar qilish mumkinchiliki hazirche yoq iken. Emma xitay hökümiti 2014-yili téléfon we intérnét alaqiside kimlik tüzümini yolgha qoyushni uqturghandin buyan, xitaydiki eng chong ikki téléfon shirkiti téléfon kartini kimlik boyiche sétish tüzümini bultur yil axiridin bashlap yolgha qoyghan. Birleshme téléfon shirkiti yene nöwette ishlitiliwatqan kimliki tizimlanmighan téléfon kartilirining 1-séntebirdin bashlap mulazimiti toxtaydighanliqini alahide uqturghan.

Xitay hökümiti bultur yil axiri téléfon we intérnétta kimlik tüzümi yolgha qoyulidighanliqini élan qilghandin kéyin, xitay tor béketliride munazire qozghilip, rast kimlik ishlitilgenliki sewebidin shexslerning mexpiyetliki ashkarilinip kétish ehwali körülse, buning jawabkarliqi kimde bolidighanliqi we puqralarning söz erkinliki cheklimige uchrishi mumkinliki qatarliq mesililer munazire témisigha aylan'ghan.

Chet'ellerdiki xitay démokratliri we gherb döletliri axbaratliri xitay hökümitini téléfon we intérnét alaqiside kimlik tüzümini yolgha qoyush arqiliq puqralarning söz erkinlikini cheklesh bilen eyibligen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet