Xangju saqchi da'iriliri “Uyghurlarni bayqighan haman saqchigha melum qilish” heqqidiki uqturushni chiqarghanliqini inkar qildi

Yéqinda ündidar we féysbuk qatarliq ijtima'iy uchur wasitiliride xangju sheherlik saqchi da'irilirining herqaysi idare-organlargha chüshürgen bir jiddiy uqturushi tarqalghan.

Mezkur uqturushning ikkinchi bölikide: “Shinjangliq Uyghurlar bayqalghan haman shu yerdiki yerlik saqchixanigha biwasite melum qilsa bolidu. Tekshürüsh arqiliq salahiyiti éniqlansa melum qilghuchigha 500 som mukapat bérilidu,” déyilgen.

Mezkur uqturushta yene, kochida pichaq türidiki tighliq eswab, chaqmaq, asan ot alghuchi buyum satqanlar, alahide késeller we iqtisadiy majiragha chétilghan erzdarlar bayqalsimu saqchigha melum qilish lazimliqi uqturulghan.

Ijtima'iy uchur wasitiliride tarqalghan mezkur uqturushta xangjuda échilish aldida turghan “20 Dölet guruhi” bashliqlirining uchrishish yighinini bixeter we tinch ötküzüshken kapaletlik qilish üchün yuqiriqi bildürgining chiqirilghanliqi eskertilgen.

Radiyomiz torda tarqalghan mezkur uqturushni delillep körüsh hemde xitay hökümet terepning bu heqtiki inkasini élish üchün xangju shehiridiki saqchixanilar bilen ahaliler komitétigha téléfon qildi. Halbuki, xangjudiki biz alaqileshken saqchixanilar bilen ahaliler komitéti bundaq bir uqturushning chiqirilghanliqini inkar qildi.