Хитайда 80 пирсәнт адәм ковид-19 вируси билән юқумлинип болған

Хитай юқумлиқ кесәлликләрни контрол қилиш вә алдини елиш мәркизиниң баш юқумлиқ кесәлликләр мутәхәссиси ву зүнйү, бир милярд 400 милйон нупуси бар хитайда 80 пирсәнт адәмниң ковид-19 вирусида юқумлинип болғанлиқини билдүргән. Лекин шундақтиму хитай юқумлиқ кесәлликләрни контрол қилиш вә алдини елиш мәркизи 22-январ елан қилған учурида, хитайда бир һәптидә пәқәт 13 миңдәк адәмниң өлгәнликини ейтқан. Мәзкур органниң билдүрүчишә, хитайда 13-январдин 19-январғичә болған бир һәптә ичидә пәқәт 12 миң 658 адәм өлгән. Уйғур елида бу вирус сәвәблик һаятидин айрилғанларниң буниң қанчә пирсәнтини тәшкил қилидиғанлиқи мәлум әмәс.

Хитай даирилири иткән йили 9-декабирдин кейин, йәни үрүмчи 24-январ от апити кәң көләмлик наразилиқни кәлтүрүп чиқирип, юқум қамалини омумйүзлүк бикар қилишиниң арқисидин, уйғур елида ковид-19 вирусға аит санлиқ мәлуматларни елан қилишни тохтатқан. Дуня сәһийә тәшкилати йеқинда хитайдин ковид-19 вирусида юқумлинип өлгәнләр вә дохтурханида ятқан бимарларға даир толуқ санлиқ мәлуматларни тәминләшини тәләп қилған иди.

“җәнубий хитай әтигәнлик почтиси” гезитиниң билдүрүшичә, ву зүнйү яшанғанларни вә башқа аҗиз гуруппиларни чаған мәзгилидә алаһидә диққәт қилишқа агаһландурған. Ву зүнйү бу агаһландурушни хитай һөкүмити уйғур елида кәң көләмлик чағанлиқ паалийәтләрни өткүзүп, уйғур вә башқа түркий мусулман милләтләрни омумйүзлүк чаған өткүзүш вә чағанни тәбрикләшкә уюштуриватқан бир вақитта оттуриға қойған. Чәт әлдики уйғур тәшкилатлири, чағанни мәҗбурий тәбрикләштәк бу хил паалийәтләр сәһийә-сағламлиқ системиси интайин начар болған уйғур районидики йеза-кәнтләрдә кәң көләмлик өлүм-йитим кәлтүрүп чқиришидин әндишә қилмақта. “җәнубий хитай әтигәнлик почтиси” гезитиниң ейтишичә, ву зүнйү “чаған мәзгилидики һәрикәтчанлиқ хитайниң әнинивий йеңи йилидики кәң көләмлик иҗтимаий һәрикәт, тарқилишчан кесәлликниң йәниму ямришини мәлум дәриҗидә тезлитиши, бәзи районларда юқумланғучилар көпийиши мумкин” дегән.