Xitayda 80 pirsent adem kowid-19 wirusi bilen yuqumlinip bolghan

Muxbirimiz erkin
2023.01.23

Xitay yuqumliq késelliklerni kontrol qilish we aldini élish merkizining bash yuqumliq késellikler mutexessisi wu zünyü, bir milyard 400 milyon nupusi bar xitayda 80 pirsent ademning kowid-19 wirusida yuqumlinip bolghanliqini bildürgen. Lékin shundaqtimu xitay yuqumliq késelliklerni kontrol qilish we aldini élish merkizi 22-yanwar élan qilghan uchurida, xitayda bir heptide peqet 13 mingdek ademning ölgenlikini éytqan. Mezkur organning bildürüchishe, xitayda 13-yanwardin 19-yanwarghiche bolghan bir hepte ichide peqet 12 ming 658 adem ölgen. Uyghur élida bu wirus seweblik hayatidin ayrilghanlarning buning qanche pirsentini teshkil qilidighanliqi melum emes.

Xitay da'iriliri itken yili 9-dékabirdin kéyin, yeni ürümchi 24-yanwar ot apiti keng kölemlik naraziliqni keltürüp chiqirip, yuqum qamalini omumyüzlük bikar qilishining arqisidin, Uyghur élida kowid-19 wirusgha a'it sanliq melumatlarni élan qilishni toxtatqan. Dunya sehiye teshkilati yéqinda xitaydin kowid-19 wirusida yuqumlinip ölgenler we doxturxanida yatqan bimarlargha da'ir toluq sanliq melumatlarni teminleshini telep qilghan idi.

“Jenubiy xitay etigenlik pochtisi” gézitining bildürüshiche, wu zünyü yashan'ghanlarni we bashqa ajiz guruppilarni chaghan mezgilide alahide diqqet qilishqa agahlandurghan. Wu zünyü bu agahlandurushni xitay hökümiti Uyghur élida keng kölemlik chaghanliq pa'aliyetlerni ötküzüp, Uyghur we bashqa türkiy musulman milletlerni omumyüzlük chaghan ötküzüsh we chaghanni tebrikleshke uyushturiwatqan bir waqitta otturigha qoyghan. Chet eldiki Uyghur teshkilatliri, chaghanni mejburiy tebrikleshtek bu xil pa'aliyetler sehiye-saghlamliq sistémisi intayin nachar bolghan Uyghur rayonidiki yéza-kentlerde keng kölemlik ölüm-yitim keltürüp chqirishidin endishe qilmaqta. “Jenubiy xitay etigenlik pochtisi” gézitining éytishiche, wu zünyü “Chaghan mezgilidiki heriketchanliq xitayning en'iniwiy yéngi yilidiki keng kölemlik ijtima'iy heriket, tarqilishchan késellikning yenimu yamrishini melum derijide tézlitishi, bezi rayonlarda yuqumlan'ghuchilar köpiyishi mumkin” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.