Хитай йезилирида ковидтин өлгәнләргә җәсәт сандуқи йетишмәй қалған
2023.01.25
BBC Ториниң 25-январ күни елан қилған хәвиридә ейтилишичә, хитай йезилиридиму ковидтин өлгәнләр көпийип, җәсәт сандуқи (гуәнсәй) ясайдиған карханилар наһайити алдираш болуп кәткән.
Өткән йил 12-айдин башлап хитайдики ковид юқуми шиддәт билән көпийип, 80 пирсәнт нопусниң, йәни 1 милярдтин көп адәмниң юқумланғанлиқи, һәр һәптидә 13 миң адәмниң өлүватқанлиқи, буларниң көпинчисиниң қерилар икәнлики мәлум болғаниди. Чүнки хитай пиланлиқ туғут сияситини йолға қойған 40 йилдин буян хитай нопусиниң қерилишиш нисбитиму өрләп маңған болуп, бу қетим ковидтин өлгәнләр ичидә қерилар әң көп нисбәтни игилигән.
Хәвәрдә көрситилишичә, хитай йезилирида давалаш үскүнилири интайин кәмчил болуп, дохтурханида өлгәнләрдин башқа, өйидә өлгәнләрму көп икән вә булар өлгәнләр саниға киргүзүлмәйдикән.
Чаған мәзгилидә чоң шәһәрләрдә җан беқиватқан зор түркүмдики хитай ишләмчилириниң өз йезисиға қайтип чаған өткүзүши ковид вирусиниң шәһәрдин йезиға ямришини кәлтүрүп чиқириши мумкин икән.
Хитай йезилирида пуқралар җәсәт сандуқи тепип қериларни көмүш билән алдираш болуп кәткәндә, уйғур йезилирида хитайниң чаған байримини тәбрикләш долқуни көтүрүлгән. “тәңритағ тори” ниң сүрәтлик хәвәрлиригә қариғанда, хотән шәһири шорбағ йезиси аһалиси хитайниң яңгер усули вә шир усули ойнап чағанни тәбриклигән. Бу йезиға чүшкән “әлни маһил қилиш тәшвиқат әтрити” ниң башлиқи фән венчиң “хитай мәдәнийитини амминиң қәлбигә сиңдүрүш” ниң наһайити мувәппәқийәтлик болуватқанлиқини билдүргән.