Xitay yézilirida kowidtin ölgenlerge jeset sanduqi yétishmey qalghan

BBC Torining 25-yanwar küni élan qilghan xewiride éytilishiche, xitay yéziliridimu kowidtin ölgenler köpiyip, jeset sanduqi (gu'ensey) yasaydighan karxanilar nahayiti aldirash bolup ketken.

Ötken yil 12-aydin bashlap xitaydiki kowid yuqumi shiddet bilen köpiyip, 80 pirsent nopusning, yeni 1 milyardtin köp ademning yuqumlan'ghanliqi, her heptide 13 ming ademning ölüwatqanliqi, bularning köpinchisining qérilar ikenliki melum bolghanidi. Chünki xitay pilanliq tughut siyasitini yolgha qoyghan 40 yildin buyan xitay nopusining qérilishish nisbitimu örlep mangghan bolup, bu qétim kowidtin ölgenler ichide qérilar eng köp nisbetni igiligen.

Xewerde körsitilishiche, xitay yézilirida dawalash üsküniliri intayin kemchil bolup, doxturxanida ölgenlerdin bashqa, öyide ölgenlermu köp iken we bular ölgenler sanigha kirgüzülmeydiken.

Chaghan mezgilide chong sheherlerde jan béqiwatqan zor türkümdiki xitay ishlemchilirining öz yézisigha qaytip chaghan ötküzüshi kowid wirusining sheherdin yézigha yamrishini keltürüp chiqirishi mumkin iken.

Xitay yézilirida puqralar jeset sanduqi tépip qérilarni kömüsh bilen aldirash bolup ketkende, Uyghur yézilirida xitayning chaghan bayrimini tebriklesh dolquni kötürülgen. “Tengritagh tori” ning süretlik xewerlirige qarighanda, xoten shehiri shorbagh yézisi ahalisi xitayning yanggér usuli we shir usuli oynap chaghanni tebrikligen. Bu yézigha chüshken “Elni mahil qilish teshwiqat etriti” ning bashliqi fen wénching “Xitay medeniyitini ammining qelbige singdürüsh” ning nahayiti muweppeqiyetlik boluwatqanliqini bildürgen.