Хитайниң ковид-19 санлиқ мәлуматлири йәнила дохтурхана сиртида вирус билән ‍өлгәнләрни ашкарилимиған

Хитай юқумлуқ кесәлликләрни контрол қилиш вә алдини елиш мәркизи йеқинда хитайдики ковид-19 вируси юқумиға аит әң йеңи санлиқ мәлуматларни елан қилған болсиму, лекин униң санлиқ мәлумати дохтурхана сиртида вирус билән ‍өлгән бимарларни ашкарилимиған. Хитай юқумлуқ кесәлликләрни контрол қилиш вә алдини елиш мәркизи 25-январ күни ‍өзиниң тор бекитидә хитайдики юқум вәзийитиниң тәрәққиятиға аит әң йеңи санлиқ мәлуматларни елан қилған. Мәзкур органниң ейтишичә, ‍өткән йили 22-декабир күни хитайда ковид-19 вирусидин юқумланғучилар 6 милйон 940 миңға йетип, әң юқири пәллигә чиққан. Шуниңдин кейин юқумланғучилар пәйдин-пәй азийип, бу йил 23-январ күни әң төвән чәккә чүшкән.

Санлиқ мәлуматта, вируста юқумлинип дохтурханида өлгән бимарларниң бу йил 4-январ күни 4273 кә йетип, әң юқири пәллигә чиққанлиқи, лекин шуниңдин кейин өлгәнләрниң сани азийишқа қарап меңип 23-январ күни әң төвән чәккә чүшкәнлики, шу күни хитай бойичә 896 кишиниң өлгәнликии билдүрүлгән. Лекин хитай бу санлиқ мәлуматни дуня сәһийә тәшкилати хитайни ковид-19 вирусиниң тәсирини йениклитип елан қилиш, ковид вирусида өлгүчиләргә интайин тар ениқлима бериш билән тәнқид қиливатқан бир вақитта елан қилған.

Дуня сәһийә тәшкилати хитайниң өзлирини ковид-19 вирусида өлгүчиләргә аит техиму изчил, толуқ вә ишәнчлик мәлуматлар билән тәминлишини тәләп қилип кәлди.

Хитай пуқралириниң радийомизға мәлум қилишичә, хитай һөкүмитиниң санлиқ мәлумати дохтурхана сиртида вирус билән ‍өлгән бимарларни өз ичигә алмайдикән. Хитайниң вухән шәһиридики хәлқ ишлири тармақлири билән йеқин мунасивити бар бир хитай пуқраси, вухәнниң хуаңпу районида 900 миң адәм барлиқи, бу районниң өзидила бир ай ичидә 5 миңдин артуқ адәм ‍өлгәнликини ейтқан.