Washin'gton pochtisi géziti xitaydiki tejribixana bixeterlikidiki yochuqning yéngi yuqumgha seweb bolushi mumkinlikini bildürgen

Washin'gton pochtisi géziti xitaydiki bi'o-ximiye tejribixanilirining bixeterlik ölchimi heqqide zor kölemlik bir tekshürüsh doklati élan qilghan.

12-Aprél küni élan qilin'ghan bu tekshürüsh doklatida, xitayning bi'o-ximiye tejribixanilirining bixeterlikige kapaletlik qilishtiki yétersizliki sewebidin yene bir qétimliq keng kölemlik yuqum yüz bérish xewpining her waqit mewjutluqi eskertilgen.

Washin'gton pochtisi géziti bu tekshürüsh doklatini xitayda tarqalghan sars, koruna wirusliri we axbaratlarda anche diqqetke érishelmigen bashqa wirus tarqilish weqelirige a'it sanliq melumatlar, tetqiqat netijiliri we mutexessislerning bayanliri asasida teyyarlighan. Uningda xitaydin ibaret hakimmutleq döletning wirusqa a'it uchurlarni xelq'ara bilen ortaqlashmasliqi, emeliyetni yoshurushi seweb bolghan we bolidighan éghir aqiwitimu eskertilgen.

Doklatta koruna wirusining wuxendiki tejribixanidin tarqap ketkenlikidek bir éhtimal bilen yolgha chiqip turup, xitayning mushundaq xeterlik tejribilerni bir terep qilishtiki iqtidari tehlil qilin'ghan. Uningda déyilishiche, xitayda yüz bergendek tejribixana hadisiliri amérikida 70-yillirida zamaniwi bixeterlik ölchimi qollinilishtin ilgiri yüz bérip baqqan. Emma taki 2020-yilighiche xitaydiki tejribixanilarni ziyaret qilip baqqan chet'ellik mutexessislerning déyishiche, xitaydiki tejribixanilardiki bixeterliki hazirmu ölchemge toshmaydiken. Mesilen, tejribixanida ishlitilgen üsküniler we tejribe qilin'ghan haywanlarning qanunsiz halda sétilishi, tejribixanidin chiqqan exlet we suning bixeter bir terep qilinmasliqidek ehwallar éghir iken.

Washin'gton pochtisi gézitining doklatida déyilishiche, xitay gerche kowid-19 yuqumidin kéyin qanun maqullap bu jehettiki tedbirlerni chingitidighanliqini jakarlighan bolsimu, emma uning u qanun'gha emel qilghan-qilmaywatqanliqini bilish mumkin emes iken. Chünki u hazirghiche xelq'araliq tekshürgüchilerning wuxende tekshürüsh ep bérishigha yol qoymighan.

Tekshürüsh doklati axirida, mana shuningdek nurghun amillarni közde tutqanda dunyaning koruna wirusi yuqumigha oxshash yene bir nöwetlik yuqumning xewpige uchrash éhtimalliqi yoq dégili bolmaydighanliqi xulasilen'gen.