Amérika xitaydin kélidighan yoluchilargha kowid siniqi élip baridighanliqini jakarlidi

2022.12.29

Xitay hökümiti üch yildin béri yolgha qoyuwatqan “Yuqumni nölge chüshürüsh” siyasiti meghlub bolup, yuqum tedbirlirini biraqla boshatqandin kéyin, xitayda korona wirusi qaytidin yamrashqa bashlighan. Shundaq bir peytte xitay hökümitining chigrani échip, puqralarning chet el sayahetlirini eslige kelـtüridighanliqini jakarlishi, herqaysi döletlerde 2020-yilidiki dunya xaraktérliq kowid yuqumining qayta tekrarlinip qélishidek endishini peyda qilmaqta.

Amérika hökümiti 28-dékabir charshenbe küni, xitaydin kélidighan sayahetchilerge chigradin chiqishtin eng köp dégende ikki burun kowid siniqi qilish we netijisining menpiylikini ispatlaydighan ispat qeghizi bolush tedbiri qoyghanliqini jakarlidi. Bu tedbir peqet xitaydin biwaste uchidighan ayropilanlardiki sayahetchilergila emes belki yene xongkong, makawdin biwaste uchidighan hemde sé'ul, toronto we wankowér qatarliq üchinchi döletler arqiliq uchidighan ayropilanlardiki sayahetchilernimu öz ichige alidiken.

CNN Téléwiziyesining xewer qilishiche, amérika buning bilen xitay sayahetchilerge cheklime qoyghan 5-dölet bolup qalghan. Mezkur belgilime 5-yanwar künidin bashlap resmiy yolgha qoyulidiken.

Aldimizdiki künlerde xitayning chaghan bayrimi munasiwiti bilen milyonlarche xitay sayahetchining chet ellerge sayahetke chiqishi mölcherliniwatqan bir peytte italiye, yaponiye, teywen, hindistan qatarliq dölet we rayonlar derhal tedbir qollinip, xitay sayahetchilerge chigradin chiqishtin burun choqom kowid siniqi qilish sherti qoshqan idi.

En'giliyening “Asman” xewerler torining bildürüshiche, italiye bu tedbirni ijra qilishqa bashlighan birinchi küni, yeni 28-dékabir charshenbe küni xitaydin italiyening milan shehirige yétip kelgen ikki yoluchilar ayropilanining her ikkisidiki yoluchilarning yérimidin köpi wirus bilen yuqumlan'ghan bolup chiqqan.

CNN Téléwiyezisining éytishiche, amérikadiki sehiye tarmaqliri xitay hökümitining bu qétimmu xitaydiki korona wirusining tarqilish ehwali heqqidiki sanliq melumatlarda ochuq-ashkara bolmaywatqanliqini, xitayda hazir tarqiliwatqan korona wirusining waryanti heqqidimu ishenchilik melumat yoqliqini bildürgen. Shunga ular xitay sayahetchilerge tedbir qoyush arqiliq héch bolmighanda wirusning waryantini baldurraq éniqlap chiqip, tedbir qollinishni közlimektiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.