Xitayning parixorluqqa qarshi turush komitéti amérikaning wolmart, sams kulubni agahlandurghan

Xitayning partiye ichidiki parixorluqqa qarshi turush we siyasiy intizamni qoghdashqa mes'ul bolghan merkizi intizam tekshürüsh komitéti bayanat élan qilip, amérikining xitaydiki tor baziridin “Shinjang mehsulatliri” ni éliwetken wolmart we sams kulub shirketlirini agahlandurghan. Xitayning partiye ichidiki intizamni qoghdashqa mes'ul bolghan mezkur orginining amérika shirketlirini agahlandurushi alahide diqqet qozghidi.

“Jenubiy xitay seher pochtisi” gézitining xewer qilishiche, xitay merkizi intizam tekshürüsh komitéti ötken jüme küni yeni 31-dékabir élan qilghan bayanatida, wolmart we sams kulubning xitaydiki tor baziridin “Shinjang mehsulatliri” ni chiqiriwétishi “Exmeqliq we yiraqni körelmeslik” dep eyibligen. Ularning éytishiche, sams kulub sükütte turush arqiliq “Shinjang mesilisini léyitishqa urun'ghan” iken.

Wolmart bilen sams kulub ötken yili 23-dékabir küni prézidént baydén “Uyghur mejburiy emgikining aldini élish qanuni” gha imza qoyup arqidinla ‍özlirining xitaydiki baziridin “Shinjang mehsulatliri” ni élip tashlighan. Bu weqe xitay milletchi tor abuntlirini qattiq bi'aram qilip, ular torda wolmart we sams kulubqa qarshi hujum bashlighanidi.

“Jenubiy xitay seher pochtisi” ning éytishiche, xitay merkizi intizam tekshürüsh komitéti bayanatida wolmart bilen sams kulubni agahlandurup: “Héchqandaq sewebsiz rayondin barliq mehsulatlarni chüshürüwétish yaman gherezni yoshurup, exmeqliq we yiraqni körelmeslikni ashkarilaydu. Éniqki, bu özining yaman aqiwitini keltürüp chiqiridu” dégen. Lékin közetküchilerning éytishiche, bu weqege xitay merkizi intizam komitétining inkas bildürüshi, xitayning wolmart we sams kulubning herikitidin qattiq bi'aram bolghanliqini körsitidiken.