Хитайниң сичүән өлкисидә ток йетишмәслик сәвәбидин завутлар иштин тохтиған

Мухбиримиз ирадә
2022.08.17

Хитайниң бир қисим өлкилиридә һаваниң қаттиқ иссип кетиши билән ток еһтияҗи ешип кәткән.

CNN Телевизийәсиниң хәвиридин қариғанда, ток йетишмәслик әһвалини азайтиш үчүн сичүән өлкиси барлиқ завутларни алтә күн тақаш буйруқи чиқарған.

Хитай һазир 60 йилдин буян көрүлүп бақмиған иссиқ һаваға дуч кәлгән болуп, нәччә он шәһәрдә температура 40 селсийә градустин ешип кәткән. Қаттиқ иссиқ ишхана вә өйләрдә һава тәңшигүчкә болған еһтияҗниң ешишини кәлтүрүп чиқирип, әслидила кәмчил болуватқан електр ториға болған бесимни йәниму күчәйтивәткән. Қурғақчилиқ түпәйлидин дәря сүйиниң миқдари барғансери азийип вә төвәнләп, су електр истансилириниң давамлиқ ток ишләпчиқиришини қийинлаштуривәткән. Өлкә әмәлдарлири сичүәнниң ток билән тәминләштики вәзийитиниң “әң еғир вә әң кәскин пәйткә дуч келиватқанлиқини” агаһландурған.

CNN Ниң ейтишичә, сичүәндин башқа йәнә хитайниң җяңсу, әнхуй вә җеҗяң өлкилиридиму қаттиқ иссиқ түпәйли токниң хориши тезлишип, ток йетишмәслик әһваллири көрүлгән. Улар завут вә аилиликләр районлирида токни иқтисад қилиш тәдбирлирини елан қилишқа башлиған.

Уйғур райони хитай өлкилирини ток билән тәминләп келиватқан әң асаслиқ җайларниң бири болуп, хитай өлкилиридики ток йеـтишмәслик әһвалиниң уйғур елидики ток ишләпчиқириш бесимини ашуруветидиғанлиқи пәрәз қилинмақта. Уйғур ели хитайниң интайин муһим нефит, тәбиий газ вә мәҗбурий әмгәк базиси болупла қалмай, бәлки йәнә хитайниң ички ‍өлкилирини ток билән тәминләйдиған муһим истратегийәлик еликтир ениргийә тәминат базисиға айландурулған.

Бундин башқа, сичүән өлкиси хитайдики йерим өткүзгүч вә қуяш енергийәси батарейә санаитиниңму муһим ишләпчиқириш орни болғачқа, у йәрдики завутларда иш тохташниң хитайниң ичи вә сиртидики бир қисим електрон мәһсулатлири ширкәтлириниң нормал ишләпчиқиришиға тәсир көрситиши вә хам әшя баһасини өрлитиветиши мумкин икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.