Хитайдики ишсизлиқ бесимини йәңгиллитиштә биңтүән актип рол ойнимақта

Вашингтондин мухбиримиз җәвлан тәйярлиди
2024.05.01

Уйғур районида сиясий вә иқтисадий орни йүксәлгән биңтүән һәр йили миңлиған хитай көчмәнлиригә, җүмлидин хитай оқуғучилириға иш орни тәминләп келиватқан болуп, бу йил чиқарған иш орни еланидиму “миңлиған карханилардики он миңлиған иш орниниң биңтүәндә икәнлики” алаһидә тәшвиқ қилинған.

 “биңтүән гезити” ниң 29-апрел күнидики хәвиригә қариғанда, биңтүән адәм күчи байлиқи вә иҗтимаий капаләт идариси, биңтүән дөләт байлиқи комитети, биңтүән маарип идариси қатарлиқ йәттә орун бирлишип, “2024-йиллиқ алий вә оттура техником мәктәплирини пүттүргән оқуғучиларни хизмәткә қобул қилиш” мәхсус паалийитини башлиған.

Мәзкур паалийәт торда вә нәқ мәйданда хизмәтчи қобул қилиш шәклидә елип берилған. Торда адәм қобул қилиш пүткүл уйғур райони вә ичкири хитайғиму қаритилған. Нәқ мәйданда хизмәтчи қобул қилиш паалийити шималда шихәнзә, җәнубта арал, тумшуқ қатарлиқ биңтүән шәһәрлирини асас қилип уюштурулған болуп, 379 кархана нәқ мәйданда адәм қобул қилишқа қатнашқан.

Бу хәвәрдә йәнә, бундақ ишқа орунлаштуруш паалийәтлириниң биңтүән билән йәрликниң бир гәвдилишишини тезлитиш, карханилар билән әмгәк күчлири оттурисида көврүк болуш, омумий вәзийәтниң муқимлиқини қоғдаш җәһәтләрдә муһим әһмийәткә игә икәнлики көрситилгән.

Мәлум болушичә, йеқиндин буян хитайда алий мәктәп пүттүргәнләрниң ишсизлиқ мәсилиси еғирлишиватқан болуп, уйғур райони билән биңтүән бу мәсилини һәл қилишта актип рол ойнап кәлмәктә. Ню-йоркта яшаватқан хитай вәзийәт анализчиси җең шүгуаң бу һәқтә радийомизға бәргән зияритидә, биңтүәндә һәр йили елип бериливатқан хизмәтчи қобул қилиш һәрикитиниң әмәлийәттә хитай адәм күчи байлиқи вә иҗтимаий капаләт министирлиқи тәрипидин бир туташ орунлаштурулғанлиқини билдүргәниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.