Милярд долларлиқ пул хитай базиридин чиқип кәтмәктә

Хитай һөкүмити бу бир айдин буян давамлиқ чөкүватқан иқтисади вә пай чеки базирини қутулдуруш үчүн бәзи тәдбирләрни қолланғандин кейин, 28-авғуст күни (дүшәнбә) пай чеки базири азрақ өрлигән, әмма “бломберг санлиқ мәлумати” ниң көрситишичә, бу өсүш қисқа вақитлиқ икән, чүнки чәт әл мәбләғ салғучилири мушу пурсәттә хитайниң бир милярд 100 милйон долларлиқ пай чекини сетивәткән.

Америкада чиқидиған “байлиқ” (Fortune) һәптилик журнилиниң 28-авғуст күни бәргән хәвиридә ейтилишичә, хитай һөкүмити пай чеки содисидин алидиған баҗни вә пай чеки базириға мәбләғ салғучилардин алидиған закаләт пулини азайтиш арқилиқ пай чеки базирини җанландурмақчи болған болсиму, чәт әл мәбләғ салғучилири йәнила хитай базиридин чекингән. Буниңдики асаслиқ сәвәб, америка-хитай мунасивитиниң начарлишиши, хитайниң чәт әл ширкәтлиригә болған бесими вә паракәндичиликиниң көпийиши, хитайниң мустәбит сиясити вә иқтисадиниң хараблишишқа йүзлиниши қатарлиқлар болуп, мана булар чәт әл мәбләғ салғучилирини “хитайға мәбләғ селишниң хәтири барғансери күчәймәктә” дегән қарашқа кәлтүргән.

Хитайниң дөләт карханилирини йөләп, хусусий ширкәтләргә болған бесим вә чәклимини күчәйтиши, хитайниң чоң-чоң байлириниму хитайдин айрилишқа мәҗбурлиған. Көчмәнләр учур мәркизи Henley&Partners ниң доклатиға қариғанда, 2022-йили хитайдин 10 миң 800 милйонер чәт әлгә қачқан болса, 2023-йил бу сан 13 миң 500 гә йәткән.