Xitayda köpiyiwatqan tashlanduq bina rayoni we qéchiwatqan milyonérlar diqqet qozghimaqta

Xitay hökümiti yéqinqi mezgillerde toxtimastin “Yuqiri süpetlik tereqqiyat”, “Omumyüzlük chongqur islahat” dégendek debdebilik sho'arlarni towlawatqan bolsimu, xitay iqtisadining chöküshke yüzliniwatqanliqi inkar qilishqa bolmaydighan pakitlargha ayliniwatqanliqi melum. “Dewr” gézitining 21-iyuldiki mulahize maqaliside buningdiki halqiliq sewebler alahide tekitlinish bilen birge buning bezi tepsilatliri bayan qilinidu.

Obzorda éytilishiche, xitay re'isi shi jinping hazir “Aliy islahatchi” süpitide ish körüwatqan bolsimu, xitay dahiysi déng shawping bashlighan “Islahat we échiwétish” herikiti alliqachan sugha chilashqan. Nöwettiki iqtisadiy chékinishni ongshashtiki heqiqiy islahatqa eng chong tosqunluq qilghuchi amil bolsa del shi jinpingning hakimmutleqliqi bolup qalghan.

Obzorda éytilishiche, nöwette xitay iqtisadining köp qismini igiligen öy-mülük sodisi tik siziq boyiche töwenleshke yüzlen'gen. Buning bir ipadisi kona yaki yéngi öylerning bahasining zor derijide töwenlishide eks etken bolsa, yene bir jehettin “Erwahlar makani” dep atalghan ademsiz olturaq öy rayonlirining köpiyishide öz ipadisini tapqan.

Xitay hökümiti yéqinda 42 milyard amérika dolliriliq meblegh ajritip, téxi ademler olturaqlashmighan quruq binalarni sétiwélishqa bashlighan. Halbuki xitay öy-mülük sahesi bashlap qoyghan, lékin tamamlashqa meblegh yoq toxtitip qoyghan öylerni püttürüshke az dégendimu 533 milyard amérika dolliri lazim bolidiken. Téximu muhimi, nöwette herqaysi ölkilerning asasliq kirim menbesi öy-mülük sahesige zémin sétip bérishtin kéliwatqan bolup, bu xildiki zémin sétishtin emeliyleshmigen qerzning omumi miqdari az dégendimu on tirilliyon amérika dolliridin éship ketken. Bu, pütkül xitayning yilliq milliy ishlepchiqirish omumiy qimmitining yérimigha toghra kélidiken.

Nöwette xitay kompartiyesining “Partiye hemmige rehberlik qilish” tek bixeterlik we kontrolluq méxanizmi bu xil iqtisadiy chékinishni ongshighili bolmas halgha keltürüp qoyghachqa, xitaydiki puldarlarning köpinchisi öz ilkidiki mebleghni chet'elge yötkeshke bashlighan. Chet'eldin kélidighan mebleghmu tarixtiki eng töwen sewiyege chüshüp qalghan.