Пирезидент трампниң хитай маллириға қойидиған қошумчә 10 пирсәнт таможна беҗи 4-марттин башлап йолға қоюлидикән

Америка пирезиденти доналд трампниң канада билән мексикаға қойған 25 пирсәнт таможна беҗи 4-март күнидин башлап рәсмий йолға қоюлуш билән бир вақитта, хитай маллириға қойған 10 пирсәнт қошумчә таможна беҗиму рәсмий йолға қоюлушқа башлайдикән.

Пирезидент трамп өткән һәптә хитайниң фентанилни чәкләштә йетәрлик тәдбир қолланмиғанлиқини билдүрүп, хитай маллириға йәнә қошумчә 10 пирсәнт баҗ қоюш мумкинликини елан қилған. Әгәр пирезидент трампниң фентанил сәвәбидин хитай маллириға қойидиған қошумчә 10 пирсәнт беҗи 4-март рәсмий йолға қоюлса, буниң билән униң хитай маллириға қойидиған омуми таможна беҗиниң 20 пирсәнткә чиқидиғанлиқи қәйт қилинмақта. Пирезидент трамп өткән айда хитайниң фентанилни чәклимигәнлики үчүн 10 пирсәнт, мексика билән канадаға 25 пирсәнт баҗ қойидиғанлиқини билдүргән. Арқидин канада билән мексикаға қоюлидиған таможна беҗиниң 30 күн кечиктүрүлгәнликини уқтурған иди.

Һалбуки, BBC ниң хәвәр қилишичә, америка сода министири ховард лутник 3-март күни канада билән мексикаға қоюлған таможна беҗи пилан бойичә иҗра қилинсиму, конкрет баҗ миқдариниң музакиригә бағлиқ икәнликини ейтқан. Лекин хәвәрләрдә бейҗиңни фентанилниң америкаға киришини тосушта йетәрлик тәдбир қолланмаслиқ блән әйиблигән трамп һөкүмитиниң, хитай маллириға қойған 10 пирсәнт қошумчә таможна беҗиниң 4-март йеримидин башлап йолға қоюлидиғанлиқи күтүлмәктә икән. Нөвәттә, хитай американиң қошумчә 10 пирсәнт таможна беҗи қарариға қарита өч елиш тәдбири қоллинидиғанлиқидин бешарәт бәргән.

“һәптилик хәвәрләр” журнилиниң билдүрүшичә, хитай сода министирлиқи өткән җүмә күни “әгәр америка бир тәрәплимә таможна беҗи елишта чиң туруп, алақидар тәдбирләрни рәсмий йолға қойса, хитай җәзмән күчлүк тақабил туруш тәдбирлирини алиду” дегән. BBC, анализчиларниң бейҗиң йәнила омумйүзлүк сода урушиниң алдини елишни, трамп һөкүмити билән келишим һасил қилишни үмид қилиду, дәп қарайдиғанлиқини қәйт қилған болсиму, әмма хитайниң “йәр шари вақти гезити”, бейҗиң даирилириниң бир қатар тақабил туруш тәдбирлиригә тәйярлиқ қиливатқанлиқини, американиң деһқанчилиқ вә йемәклик мәһсулатлирини нишанға елиши мумкинликини билдүргән.