Tamozhna béjidin qachqan bir qisim xitay shirketliri kambodzhaning “Alahide iqtisadiy rayoni” gha köchken

“CBS” ning 4-marttiki xewirige asaslan'ghanda, amérika pirézidénti donald tramp yolgha qoyghan tamozhna béjidin qachqan bir qisim xitay shirketliri xitaydin 1000 kilométir yiraqliqtiki kambodzhaning “Alahide iqtisadiy rayoni” gha köchüp kelgen. Amérika-xitay soda urushi xitay shirketlirining kambodzhagha salghan meblighining partlishidiki asasliq seweb bolghan.

Xewerde déyilishiche, 2016-yili, pirézidént tramp birinchi qétim wezipe öteshtin burun, kambodzhaning amérikagha qilghan éksporti yiligha texminen 3 milyard dollar iken. Ötken yili amérikagha qilghan éksporti 13 milyard dollardin éship, kambodzhaning ishlepchiqirish omumiy qimmitining %30 ge yéqinlashqan. Kambodzha hökümiti bu dölettiki zawutlarning yérimidin köprekining hazir xitaygha tewe ikenlikini, xitay shirketlirining omumiy mebleghning texminen 9 milyard dollar ikenlikini éytqan.

Amérika pirézidénti donald tramp xitay malliridin 10 pirsent qoshulma tamozhna béji élishni yolgha qoyghandin kéyin, yene bir yéngi tamozhna béji layihesini otturigha qoyup, bu 4-marttin bashlap resmiy yolgha qoyulghanidi. Buning bilen uning xitay mallirigha qoyidighan omumi tamozhna béjining 20 pirsentke chiqidighanliqi qeyt qilinmaqta. Uningda, amérikagha import qilin'ghan aptomobil, dora we mikro özek (chip) ladin 25 pirsent yaki uningdin artuq baj élish belgilen'gen idi.

Amérika taratquliri, tramp hökümitining xitaygha qarshi yolgha qoyghan yéngi tamozhna béjining amérika shirketlirini qaytidin eslige keltürüp we küchlendürüp, bir qisim xitay shirketlirige qattiq zerbe béridighanliqini ilgiri sürgenidi