Türkiyediki bir siyasiy partiye enqereni “Yeken weqesi” munasiwiti bilen xitaygha nota tapshurushqa chaqirdi

Türkiye büyük birlik partiyesining re'isi mustafa destichi türkiye tashqi ishlar ministirliqini “Yeken weqesi” munasiwiti bilen xitaygha nota tapshurup, qirghinchiliqni toxtitishqa chaqirishni telep qildi.

U türkiyeni sherqiy türkistanda yüz bergen weqelerni körmeske salmasliqqa chaqirip, sherqiy türkistandiki Uyghurlar xitay dölet we hökümet da'irilirining buyruqi bilen oqqa tutulup, shéhit qiliniwatqanliqini ilgiri sürdi.

Xitay amanliq küchliri 29‏-dékabir yeken nahiyelik saqchi idarisige hujum qilghanliqini ilgiri sürüp, 8 neper Uyghurni étip öltürgenliki, birikishini tirik tutqanliqini élan qilghan idi. Yéqinqi bir yérim ay ichide 3‏-qétim yüz bergen bu qanliq toqunush xelq'ara jama'etchilikning diqqitini qozghighan.

Amérika, xitay amanliq küchlirini özini tutuwélishqa chaqirip, Uyghurlarning her xil hoquqlirigha hörmet qilishni telep qilghan.

Mustafa destichi yene, eger xitay qetli'amni toxtatmisa, Uyghurlargha dawamliq assimilyatsiye we irqiy qirghinchiliq yürgüzse, xitay bilen bolghan barliq munasiwetni derhal toxtitishni we mesilini xelq'ara sehnige élip chiqishni telep qildi. Destichi, kütaxyadiki bashqa bir murasimda, erdoghan hökümitining yeken, qeshqerde yüz bergen weqelerge inkas qayturmighanliqini tenqid qildi.