“Mekkenziy shirkiti” ning xitay hökümitige ishligenliki ashkarilandi

Muxbirimiz eziz
2021.12.28
Share on WhatsApp
Share on WhatsApp

Idare qilip bashqurush meslihetchiliki boyiche dunyadiki üch chong meslihetchilik shirkitining biri dep qariliwatqan “Mekkenziy shirkiti” yéqinda özlirining xitay hökümiti bilen soda mu'amiliside bolghanliqini étirap qilghan.

“Blumbérg xewerliri” torining bu heqtiki xewiride éytilishiche, sot höjjetliride mezkur shirketning amérika dölet mudapiye ministirliki (besh burjeklik bina) we xitay merkiziy hökümitini bashqurush ishliri boyiche meslihet bérish mulazimiti bilen teminligenliki tilgha élin'ghan. Netijide oxshimighan tereplerning menpe'et toqunushigha yol qoyup, amérika dölet xewpsizliki üchün selbiy aqiwetlerni peyda qilghan.

Xewerde éytilishiche, mezkur shirket 2020-yili iyul éyidiki guwahliq yighinida amérika kéngesh palata ezasi marko rubiyoning so'allirigha jawab bérip: “Bizning xitaydiki hökümet bilen yaki xitay kompartiyesi bilen héchqandaq soda alaqimiz yoq” dégen. Bu mezmundiki jawab shuningdin kéyinki birnechche qétimliq munberdimu tekrarlan'ghan. Emma “Mekkenziy shirkiti” ning weyran bolushi heqqidiki sot höjjetliri bu shirketning éytqanlirining yalghan ikenlikini ashkara qilghan.

Marko rubyo bu heqtiki so'allargha jawab bérip: “Mekkenziy shirkiti bu mesile toghrisida manga birnechche qétim yalghan éytqan. Nöwettiki bu yalghanchiliq mezkur shirketning héchqandaq ishenchlik derijisi qalmighanliqini toluq namayen qildi. Emdi hökümitimizning yaki istixbarat organlirimizning ular bilen ish birliki qurushigha héchqandaq imkaniyet qalmidi,” dégen.

Halbuki, mekkenziy shirkitining bayanatchisi bu heqte söz qilip: “Biz ölke derijilik hökümetler bilen soda munasiwitide bolduq. Héchqachan xitay merkiziy hökümiti bilen hemkarlashmiduq” dégen. Emma analizchilar mekkenziy shirkiti bilen soda alaqisida bolghan “Ölke derijilik” shirketlerning kattibashliri köpinche merkiziy hökümetning yuquri derijilik emeldarliri iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet