Xitay shirketlirige élan qilin'ghan yéngi jaza xitay hökümitini qattiq perishan qildi

Amérika ana weten xewpsizlik ministirliqi 14-yanwar küni Uyghur élidiki mejburiy emgekke chétishliq xitay shirketliridin 37 shirket we karxana guruhigha iqtisadiy jaza élan qilghandin kéyin, 15-yanwar küni xitay hökümiti buninggha qattiq naraziliq bildürüp, özlirining “Tégishlik chariler” arqiliq xitay shirketlirining “Qanunluq heqlirini qoghdaydighanliqi” ni bildürdi.

Xitay hökümitining karniyi bolghan “Yer shari waqti géziti” ning 15-yanwardiki bash maqaliside éytilishiche, xitay tashqi ishlar ministirliqining bayanatchisi go jyakun bu heqte muxbirlargha söz qilip, “Amérika hökümitining shinjangdiki mejburiy emgek mesilisini kötürüp chiqishi pütünley asassiz” dégen. Shuningdek “Uyghurlarning kishilik hoquq depsendichilikige duch kéliwatqanliqi heqqidiki bayanlar pütünley quruq töhmet” dep jakarlighan.

Go jyakun yene amérika hökümitini eyiblep, “Amérika hökümiti shinjang mesilisini bahane qilip mushu xildiki zeherxendilerche wasitilerni qollinip kelmekte. Ularning bu qilmishi dölitimizning ichki ishlirigha qopalliq bilen arilashqanliq, shuningdek dölitimizning tereqqiyatini boghush urunushi, xalas” dep xulase chiqarghan.

Amérika ana weten xewpsizlik ministirliqining ministiri aléxandro mayorkas (Alejandro N. Mayorkas) 37 Xitay shirkitige jaza élan qilish heqqidiki qararni élan qilghanda özlirining “Uyghur mejburiy emgikining aldini élish qanuni” boyiche mejburiy emgekke chétishliq shirketlerni jazalash meydanidin hergizmu wazkechmeydighanliqini alahide jakarlighan idi.

Halbuki, xitay hökümitining özliri élan qilghan köpligen sanliq melumatlar hemde oxshimighan nopuzluq tetqiqat orunlirining tekshürüsh doklatliri Uyghur élidiki mejburiy emgekning yildin yilgha kéngiyiwatqanliqini, buning chétilish da'irisi aptomobil zapchasliri, kan bayliqi, küntaxta, énérgiye bayliqi qézish, kéwez térish, toqumichiliq qatarliq köpligen sahelerde muhim salmaqni igilewatqanliqini körsitip kelmekte.