Amérika jaza tedbiri qoyghan xitay shirketlirining ziyan tartiwatqanliqi melum

Muxbirimiz irade
2020-09-17
Élxet
Pikir
Share
Print

Uyghur aptonom rayonluq da'iriler yéqinda "Aptonom rayonning tashqi soda, tashqi mebleghni muqimlashturush xizmiti layihesi" dep atalghan 18 türlük tedbirni otturigha qoyghan.

Amérika hökümiti yéqindin buyan arqimu-arqidin Uyghur élidiki mejburiy emgekke chétishliq bolghan bingtu'en'ge, bashqa nurghun shirket we karxanilargha jaza tedbiri élan qilghan idi. Shunga xitay hökümiti élan qilghan bu tashqi sodini muqimlashturushqa alaqidar tedbir közetküchilerning diqqitini qozghidi.

"Tengritagh tori" ning xewiridin melum bolushiche, "Uyghur rayonluq tashqi soda, tashqi mebleghni muqimlashturush ishxanisi" teripidin élan qilin'ghan bu xizmet layiheside "Herqaysi jaylarning tashqi soda import-éksporti, tashqi mebleghni muqimlashturush nishanini orundishigha heydekchilik qilish؛ dölet we aptonom rayonning bajni kémeytish, heqni töwenlitish, pul mu'amile yardimini yenimu kücheytish arqiliq karxanilargha yardem bérishini kücheytish we bu arqiliq karxanilarning qéyinchiliqini hel qilish, karxanilarning mesile inkas qilish we hel qilish yollirini yenimu rawanlashturush kérek," dégendek teklip-pikirler orun alghan.

Chet'ellerdiki közetküchiler yuqiriqi mezmunlar Uyghur élidiki amérika hökümiti teripidin jazalan'ghan we mehsulatlirining amérikagha kirishi cheklen'gen xitay shirketlirining iqtisadiy jehettin qéyin ehwalgha chüshüp qalghanliqini körsitip béridighanliqini, buni amérikaning mejburiy emgekni jazalash yolidiki qazan'ghan netijilirining biri, dep qarashqa bolidighanliqini éytti.

Amérika tamozhna we chégra qoghdash idarisi 14-séntebir düshenbe küni "Besh xil tutup qélish buyruqi" élan qilip, yene besh orun teripidin ishlep chiqirilghan barliq mehsulatni mejburiy emgekke chétishliq dep békitken we ularning amérika bazirigha kirishini chekligen idi. Amérikaning bundaq tedbirlerni yenimu kéngeytidighanliqi melum.

Toluq bet