Donald tramp xitayning féntanil we qanunsiz köchmenler éqinigha qarshi xitay mallirigha qoshumche 10 pirsent baj qoyidighan boldi

Amérikaning yéngi saylan'ghan pirézidénti donald tramp, wezipige olturghan küni xitayning féntanil we qanunsiz köchmenler éqinigha qarshi xitay mallirigha qoshumche 10 pirsent baj qoyidighanliqini bildürgen.

Roytérs agéntliqining ashkarilishiche, nöwette trampning meslihetchiliri féntanil mesiliside xitaygha pirézidént jow baydéndin téximu qattiq qol bolushni teshebbus qilmaqtiken. Donald tramp 25-noyabir özining “Heqiqet” ijtima'iy taratqu supisida élan qilghan uchurida, xitay mallirigha qoshumche 10 pirsent baj qoyush bilen bir waqitta yene méksika we kanadadin kirgen mallargha 25 pirsent baj qoyidighanliqini éytqan. Nöwette, donald tramp amérikaning féntanil we qanunsiz köchmenler éqinining hujumigha uchrawatqanliqini qeyt qilmaqta. U “Heqiqet” supisidiki uchurida, “Tamozhna béji zeherlik chékimlik, bolupmu féntanil we qanunsiz chet el köchmenlirining dölitimizge éqip kirishi toxtighuche dawamlishidu” dégen.

Uning éytishiche, u burun xitay bilen zeherlik chékimlikning, bolupmu féntanilning zor miqdarda amérikagha yollinishi heqqide köp qétim sözleshken bolsimu, héchqandaq ünümi bolmighan. Kéler yili 20-yanwar küni resmiy wezipige olturidighan tarmp mundaq dégen: “Xitay wekilliri manga bu ishta qolgha chüshken zeherlik chékimlik etkeschilirige eng éghir jaza, yeni ölüm jazasi béridighanliqini éytqan. Epsuski, ular héchqachan wedisige emel qilmidi.”

Xitay re'isi shi jinping 2023-yili 11-ayda san-fransiskoda pirézidént baydén bilen körüshkendimu féntanilgha qarshi pikir birliki hasil qilghan. Eyni waqitta baydén hökümiti xitayning Uyghurlarni basturushi sewebidin émbargo qoyulghan xitay j x ministirliqining edliye institutini qara tizimliktin chiqarghanidi. Tramp, méksika bilen kanadaning uzundin béri dawamliship kéliwatqan bu mesilini hel qilishqa hoquqluq hem uning buni asanla hel qilishqa küchi yétidighanliqi, lékin “Bu qétim ularning bu küchini ishlitishini telep qilghanliqi, lékin shuningghiche ularning chong bedel tölesh waqti kelgenliki” ni éytqan. Biraq, xitayning washin'gtonda turushluq elchixanisi 25-noyabir buninggha inkas qayturup, “Héchkimning soda urushi yaki tamozhna béji urushida ghelibe qilalmaydighanliqi” liqini bildürgen. Roytérs agéntliqining qeyt qilishiche, xitay elchixanisining bayanatchisi lyu péngyü, xitayning féntanil matériyallirining amérikagha éqip kirishige qesten yol qoyghanliqigha da'ir pikirlerning “Pakit we ré'alliqqa pütünley uyghun emesliki” ni ilgiri sürgen.