Xitaygha meblegh salghuchilar téz sür'ette azaymaqta

Muxbirimiz eziz
2022-04-26
Share

Yéqinda xelq'ara pul-mu'amile teshkilati élan qilghan eng yéngi doklatta körsitilishiche, xitay nöwette chet'el meblegh salghuchilar eng qachidighan bazarlarning birige aylinip qalmaqtiken. Yene kélip mart éyining özidila xitaydin chékindürülgen meblegh 17 milyard amérika dolliridin ashidighan bolup, mutexessisler bu xildiki chet'el meblighining xitaydin éqip chiqip kétish hadisisini “Héchqachan misli körülmigen sewiyediki mebleghdin ayrilip qélish” dep xulase chiqarghan.

CNN Agéntliqining 25-apréldiki obzor maqaliside körsitilishiche, ötken nechche on yilda gherb dunyasidiki meblegh salghuchilar üchün xitay eng chong we eng jelpkar bazar bolup kelgen. Emma rosiyening ukra'inagha tajawuz qilishidin kéyin xitayning oxshimighan shekillerde rosiyeni qollishi chet'el meblighining éqip kétishige seweb bolghan eng chong amil bolup qalghan. Chünki gherb dunyasi rusiyege qarshi türlük jaza tedbirlirini ijra qiliwatqanda xitayning bu sepke qoshulmasliqi hemde “Mötidil artis” qiyapitige kiriwélishi xitayning kéyinki qedemde mushu xil jazalarning ortaq nishanigha aylinip qélishidin bésharet bergen. Yene kélip amérika merkiziy banka sistémisi 2018-yilidin buyan tunji qétim amanet pulning ösüm nisbitini ashurghan bolghachqa meblegh sahiblirining mutleq köp qismi üchün amérika xitaygha qarighanda bekrek jelp qilish küchige ige bolghan. Iqtisadshunaslardin martén chorzémpa (Martin Chorzempa) bu heqte söz qilip “Amérika fédératip amanet sistémisining ösüm nisbiti ashqanliqtin xitayning muqimlashturuwétilgen sistémisi qaysila jehettin qarighanda öz jelpkarliqini yoqatti. Xitay pulining dollargha ayriwashlinish nisbitimu alte aydin buyanqi eng töwen sewiyege chüshüp qaldi” dégen.

Xitay hökümiti zor küch bilen ijra qiliwatqan “Wirusni nölge chüshürüsh” heqqidiki chaqiriqlarmu öz nöwitide xitaygha meblegh salghuchilarning kelgüsi heqqidiki endishilirini ashuruwatqan bir muhim amil bolup qalghan. 2021-Yili iyul éyida élan qilin'ghan wirus heqqidiki bir qatar belgilimiler tüpeylidin xususiylar igidarchiliqidiki ma'arip sahesila az dégendimu 120 milyard amérika dolliriliq shexsiy mektep oqutushini toxtitip qoyushqa mejbur bolghan. Xitaydiki mislisiz qattiqliqta ijra boluwatqan qamal charilirimu mebleghning oburutqa kirishini cheklep turuwatqanliqtin xitaygha meblegh salghuchilar ete néme ish bolidighanliqini mölcherligili bolmaydighan bu memliketke meblegh sélishning bekmu zor tewekkülchilik bolup qalidighanliqini tonup yetken. Jümlidin shangxeydiki qamal chariliri tüpeylidin bu rayondiki ghayet zor chet'el zawutliri taqilishqa mejburlinish yaki teminlesh zenjiri üzülüp qélish qismitige duchar bolghan. Bularning hemmisi qoshulup, xitayni menbe qilghan paycheklirining bahasi zor derijide chüshüp kétishke seweb bolghan.

2021-Yili xitaygha éqip kirgen chet'el meblighi 173 milyard amérika dolliri bolup “Tarixtiki eng yughuri rékort yaritilghan” dep jakarlan'ghan iken. Emma yuqiriqi bir qatar sewebler tüpeylidin nöwette bu mebleghning mutleq köp qismi chet'elge qaytip kétish qismitige duch kelmektiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet