Америка дөләт мәҗлис әзалири вал-ситритни хитайға мәбләғ селиштин чәкләш койиға чүшкән

Алдинқи һәптә, байдин һөкүмити америкалиқ мәбләғ салғучиларни хитайниң юқири техника саһәсигә мәбләғ селиштин чәклигәниди.

“вашингтон почтиси гезити” ниң тонулған язғучиси җош рогинниң бу һәқтә елан қилған “америкилиқлар хитайниң һәрбий кеңәймичиликигә өзлириму билмәстин мәбләғ салмақта” намлиқ мулаһизисидин қариғанда, америка дөләт мәҗлиси әмди хитай армийәси вә униңға мунасивәтлик ширкәтләрниң америкилиқларниң пулидин пайдилинишиға йол ечиватқан йәнә бир йочуқни етишкә тиришиватқан болуп, у болсиму вал кочисидики (вал-ситрит) мәбләғ башқуруш ширкәтлирини америкалиқ мәбләғ салғучиларниң пули билән хитай ширкәтлиригә мәбләғ селиштин тосуштин ибарәт икән.

Униңда дейилишичә, пирезидент байдинниң мәмурий буйруқи конкрет кәсипләргә биваситә мәбләғ селишни өз ичигә алған болсиму, әмма у американиң пенсийә фонди вә университет фонди қатарлиқ чоң орган мәбләғ салғучилирини йетәкләйдиған ғайәт зор вал кочисиниң хитай ширкәтлиригә мәбләғ селишини һәл қилмайдикән.

Мәсилән, вал ситрит көрсәткүч мәблиғи ичидә, америка һөкүмити хитай армийәси билән мунасивити бар яки хитайниң бастурушлириға қатнашқан дәп қара тизимликкә киргүзгән он нәччә ширкәт бар бар болуп, йеқинда майк галлагер башчилиқидики мәҗлис әзалири вал-ситриттики икки чоң мәбләғ селиш ширкити болған BlackRock вә MSCI рәһбәрлиригә хәт йезип, уларниң мәбләғ фондиниң әмәлийәттә американиң дөләт бихәтәрликигә бузғунчилиқ қиливатқанлиқини агаһландурғаниди.

Чүнки, хитайниң күрәшчи айропилан ишләпчиқиридиған хитай авиятсийә санаити ширкити (AVIC), хитай үчүн уруш парахоти ишләпчиқиридиған хитай дөләтлик парахот ясаш ширкити һәмдә америка тәрипидин ядро техникисини хитай армийәсигә йөткәшкә урунди, дәп әйибләнгән “CGN Power” чәклик ширкитиниң һәммиси биваситә яки тармақ ширкәтлири арқилиқ MSCI вә BlackRock фондиға четилидикән. Бу уларниң америкилиқ мәбләғ салғучилардин васитилик һалда пул тапшурувалғанлиқидин дерәк беридикән.

Шуңа һазир америка дөләт мәҗлис әзалири мана бу йочуқни етиш үчүн һәрикәткә өткән, улар бу арқилиқ америкалиқларниң американиң дөләт мәнпәәтигә зиян беридиған вә уйғурларға қаритилған ирқий қирғинчилиққа бихудларчә мәбләғ селишини чәкләшни нишан қилған.