Kurd kampbél amérikaning xitaygha taqabil turushta asiyadiki shérik döletler bilen keng kölemlik hemkarliq ornitidighanliqini éytqan

Muxbirimiz irade
2022-01-07
Share

Amérika aqsara'iyning asiya ishlirigha mes'ul yuqiri derijilik emeldari kurd kampbél xitaygha taqabil turush üchün amérikaning asiyadiki shérik döletler bilen bolghan hemkarliqini kücheytidighanliqini bildürgen.

Amérika awazi radiyosining xewer qilishiche, kurd kampbél 6-yanwar küni washin'gtondiki bir aqillar merkizining yighinigha qatnashqanda shi jinping rehberlikidiki xitay hökümitining ichki we tashqi siyasetlirini we shundaqla uning hindi-tinch okyan rayonida yürgüzüwatqan zomigerlik siyasetlirini tenqid qilghan.

U xitayning bügünkidek dunya sehniside qed kötürüshide amérikaning yardimining muhim rol oynighanliqini, emma ötken bir qanche yilda xitayning awstraliyege qarita zorluq-rombiliq xaraktérlik iqtisadiy tedbirlerni qollan'ghanliqini, jenubiy déngiz, sherqiy déngiz, teywen boghuzi we hindistan bilen bolghan igilik hoquqi mesililiridimu nahayiti zomigerlerche heriket qilghanliqini, qisqisi uning pütün dunyagha qarita “Urush börisi diplomatiyesi” bilen shughulliniwatqanliqini éytqan.

U mundaq dégen: “Ochuqini éytqanda, biz xitayning qiliwatqan bu heriketlirining parakendichilik peyda qilip, biz we shériklirimizning menpe'eti üchün xizmet qilidighan asiya meshghulat sistémisini qalaymiqanlashturuwatqanliqini hés qiliwatimiz” dégen.

Shunga u “Asiya rayoni amérika heqiqetenmu oyunni kücheytishi kérek bolghan rayon” dep tekitlep, amérikaning 2022-yilida hindi-tinch okyan rayonidiki shérik döletler bilen en'eniwi diplomatik we herbiy hemkarliqini ashurushtin bashqa, iqtisadiy hemkarliq, pen-téxnika we uchur hemkarliqini ashurushqimu alahide ehmiyet béridighanliqini bildürgen. U: “Bizning xitaygha qaritidighan siyasitimiz del xitayning etrapidiki ittipaqdash döletler bilen keng kölemlik hemkarliq ornitish bolidu” dep körsetken.

Kurd kampbél ötken yili 5-ayda stanford uniwérsitéti sahibxaniliq qilghan bir pa'aliyette söz qilghandimu “Amérikada xitay bilen keng kölemde arilishish dep teswirliniwatqan dewr emdi axirlashti, amérikaning xitaygha qaritidighan siyasiti yéngi bir yürüsh istratégiyelik paramétirlar (da'ireler) ichide bolidu we uningdiki hökümranlq endizisi riqabette bolidu,” dégenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet