Америка кеңәш палатаси әзалириға хитайға қарши қанун лайиһәси түзүш йолйоруқи берилгән

Мухбиримиз җәвлан
2021-02-24
Share

Ройтерс агентлиқиниң 23-феврал бәргән хәвиригә қариғанда, америка кеңәш палатаси демократлар партийәси рәһбири чак шумер (Chuck Schumer) кеңәш палата әзалириға хитайниң тәһдитигә қарши қанун лайиһәси түзүш йолйоруқи бәргән. Униң билдүрүшичә, кеңәш палата әзалири икки партийәниң хитайға қарши қаттиқ қол болуштәк принсипи бойичә иш көрүп, америкиниң пән-техникидики йетәкчи орнини қоғдаш вә хитай билән болуватқан тәңсиз содиға зәрбә бериш үчүн тәдбир елиши керәк икән.

Хәвәрдә ейтилишичә, чак шумер кеңәш палата әзалириға, җүмлидин дөләт мәҗлисидики һәр қайси комитет әзалириға һавалә қилған бу вәзипә американиң муһим истратегийәлик нишани болуп, американиң 1000 милярд доллар аҗритип, сүний әқил, квантлиқ һесаблаш вә йерим өткүзгүч қатарлиқ һалқилиқ техникиларни тәрәққий қилдуруп, бу риқабәттә хитайни мәғлуб қилиш вә америкиға йеңи хизмәт пурсити яритиш мәқсәт қилинидикән.

Шуниң билән бир вақитта, хитайға қарши күчлүк мәйданда туруватқан җумһурийәтчиләр байдин һөкүмитигә бесим қилип, униң трамп һөкүмитиниң сияситидә чиң туруп, хитай һөкүмитигә қаттиқ қол болушини тәләп қилған. Байдин һөкүмити хитайниң сияситигә қайтидин қарап чиқиватқанлиқини билдүргән һәмдә хитайға һәр хил усуллар билән қарши туридиғанлиқиға вәдә бәргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт