Никкий һейли: “корнел университети хитайға қарши сөз қилған ризвангүлни қоғдимиғанлиқидин номус қилиши керәк!”

Мухбиримиз әркин
2022.03.18
Share on WhatsApp
Share on WhatsApp

Американиң сабиқ президенти трамп дәвридики б д т да турушлиқ баш әлчиси никки һейлей, корнел университетидики бир йиғинда бир уйғур оқуғучиниң өз хәлқигә қаритилған ирқий қирғинчилиқни әйиблишигә қарита хитай оқуғучилириниң йиғинни байқут қилишиға корнел университетиниң тутқан позитсийәсини тәнқидлигән. У сөзидә бу университетниң “номус қилиши керәклики” ни билдүргән. Игилинишичә, мәзкур йиғинда корнел университетиниң асперант оқуғучиси, йеңи зелландийә пуқраси болған ризвангүл нурмуһәммәд йиғинға екран арқилиқ қатнишип нутуқ сөзлигән америка авам палата әзаси елисса слоткиндин суал сориған.

Иниси мәвлан нурмуһәммәд хитай даирилири тәрипидин тутқун қилинған ризвангүл нурмуһәммәд, елисса слоткиндин украинаға актип ярдәм қиливатқан хәлқара җәмийәтниң немә үчүн хитайниң уйғурларға қаратқан ирқий қирғинчилиқиға қарита техиму көп имбарго йүргүзмигәнликини сориған. Буниң билән у йиғин мәйданидики хитай оқуғучилириниң мәсхрисигә учриған, 40 тәк хитай оқуғучи йиғин мәйданидин чиқип кәткән. Бу вәқә хәлқара таратқуларниң диққитини қозғиған, корнел университети өз оқуғучиси ризвангүл нурмуһәммәдни қоғдимаслиқ билән әйибләнгән иди.

“вашингтон әркин маяк” гезитиниң хәвәр қилишичә, никки һейлей корнел университети “ризвангүлгә игә чиқмиғанлиқи үчүн нумус қилиши керәк” дигән.

У йәнә “өз қәлбиниң ризвангүл билән биллә” икәнликини билдүрүп: “у авазиниң күчидин пайдилинип, коммунист хитайниң уйғур хәлқигә қаратқан ирқий қирғинчилиқи һәққидә һәқиқәтни сөзлиди. Корнел униңға игә чиқмиғанлиқидин нумус қилиши керәк. Мән униң йүз бериватқан ишларни дуняға давамлиқ сөзлишини үмид қилимән,” дәп көрсәткән.

Ризвангүлниң иниси мәвлан нурмуһәммәд хитайниң 2017-йили уйғур диярида башлиған чоң тутқунида тутқун қилинған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт