Америкилиқ мутәхәссис: «кишилик һоқуқ хитайға тақабил туруштики биринчи номурлуқ қорал болуши керәк»

Мухбиримиз шөһрәт һошур
2018-04-04
Share

Америкиниң нопузлуқ истратегийә тәтқиқат институтлиридин бири болған «америка ширкити» ниң асия ишлири мудири билументал, җон хопкинс онвеситида 30 март күни ечилған бир йиғинда америкиниң хитайға қарши әң чоң қоралиниң кишилик һоқуқ мәсилиси болуши керәкликини вә хитайда әң еғир дәриҗидә езиливатқан уйғур мусулманлириниң мәсилисини оттуриға елип чиқиш керәкликини оттуриға қойған.

Мәзкур тәтқиқат орниниң асия ишлири мудири данеил билументал бу һәқтики сөзидә америкиниң хитай билән болған риқабитиниң ялғуз һәрбий вә иқтисадий саһәдә чәкләнмәслики керәкликини, хитай компартийәси садир қиливатқан кишилик һоқуқ дәпсәндичиликини ашкарилаш үчүн мәхсус һәрикәт елип берилиши керәкликини тәкитлигән. У сөзидә уйғурлар һәққидә тохтилип мундақ дегән: «хитайниң шинҗаңдики сиясити дунядики мусулманлар арисида йүргүзүлүватқан әң залиманә сиясәттур, әмма бу әһвални билидиғанлар бәкла аз.»

«Бүйүк ера» гезитиниң бүгүнки бу һәқтики хәвиридә баян қилинишичә, тәтқиқатчи даниял билументал өткән йили сентәбирдә ечилған йәнә бир қетимлиқ истратегийә йиғинида америкиниң тинч окяндики мәнпәәтлирини қоғдаш үчүн хитайни тизгинләш керәклики, уни давамлиқ пассип һаләттә қалдуруш, һәргизму һуҗум һалитигә кәлтүрмәслик керәкликини оттуриға қойған.

У шу қетимқи сөзидә «хитайға қилишимиз керәк болған вә қилған чеғимизда үнүм бәргән йол дәл хитайни қорқутуштур,» дегән. У йәнә шималий корейәни гәпкә киргүзүшниң алдида хитайни шималий корейәгә ярдәм қилғиниға пушайман қилдуруш лазимлиқини тилға алған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт