Amérika, yaponiye urush paraxotliri jenubiy déngizda filippin qisimlirigha qoshulup, xitaygha küch körsetken

Washin'gtondin muxbirimiz erkin teyyarlidi
2024.04.08

Amérika, yaponiye, awstraliye urush paraxotliri 7-aprél küni jenubiy déngizda filippin qisimlirigha qoshulup, xitayning bu rayondiki filippin'gha qarshi élip bériwatqan tehditlirige qarita ortaq charlash élip bérishqa bashlighan.

Amérika déngiz armiyesi instituti torining xewerliridin melum bolushiche, 7-aprél küni amérika, yaponiye, awstraliye we filippinning 6 dane urush paraxoti bilen 4 urush ayropilani jenubiy déngizda ortaq charlash herikitini bashlighan. Bu töt döletning ortaq charlash herikiti xitayning filippin déngiz armiyesining rayondiki ‍arqa sep teminlesh pa'aliyetlirige ighwagerchilik qilishining arqisidin bashlan'ghanliqi qeyt qilinmaqta. Buning aldida amérika tashqi ishlar ministiri bilinkén xitayni uning jenubiy déngizda filippin paraxotlirigha “Qoralliq” hujum qilishi, amérika-filippin ortaq mudapi'e shertnamisining heriketke ötüshini keltürüp chiqirishi mumkinlikini agahlandurghanidi.

Melum bolushiche, yéqindin béri xitayning déngiz sahili charlash qisimliri we déngiz qoralliq etretliri filippin déngiz iqtisadiy rayonlirida su nasosi ishlitish, qamal qilish manéwiri élip bérish, yiraq musapilik radiyo dolqunliri üskünisi orunlashturush, filippin kémilirini soqush qatarliq usullarni qollinip, filippin'gha qarita ‍ighwagerchilikni barghanche kücheytken. Xitay tashqi ishlar ministirliqi filippin'gha uning igilik hoquq da'irisidiki bir aralda muqim herbiy ul eslihesi qurushigha qarshi resmiy tehdit sélip, bu rayondiki “Zémin igilik hoquqini qet'iy qoghdaydighanliqi” ni ilgiri sürgenidi.

Melum bolushiche, amérika bilen filippinning jenubiy déngizdiki tunji ortaq charlash pa'aliyiti ötken yili 11-ayda élip bérilghan bolsimu, lékin 7-aprél élip bérilghan charlash köp dölet qisimlirining tunji qétimliq charlash herikiti bolghan, shundaqla buninggha yaponiye tunji qétim qatnashqan. “Maliye waqti” gézitining bildürüshiche, filippin, yaponiye we amérika bu heptining axirliri washin'gtonda ötküzidighan üch tereplik uchrishishida, bixeterlik hemkarliqini téximu kücheytmekchi iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.