Америка дөләт мәҗлисидә хитайға қандақ қарши туруш тоғрулуқ сиясий муназириләр күчәймәктикән

Мухбиримиз җәвлан
2021-06-29
Share

Хитай тәһдитиниң давамлиқ күчийишигә әгишип америка дөләт мәҗлисидики сиясәтчиләр бу зор тәһдиткә қарши турушниң тәхирсиз мәсилә икәнликини тонуп, униңға үнүмлүк тақабил турушниң йоллири һәққидә издәнмәктикән.

"содиниң ички әһвали" (Business insider) торида елан қилинған бир мақалидә көрситилишичә, трамп дәвридин кейин америкалиқларниң хитайға болған қариши өзгәргән, йәни америкалиқлар өзидин мәғрурлинишни ташлап, хитайниң тәһдитигә һошяр болушқа башлиған.

Америка хәлқидики бу йүзлиниш америка дөләт мәҗлисидиму әкс әткән болуп, җумһурийәтчиләр билән демократларниң хитай тәһдитигә бирликтә тақабил туруш мәйданида тарихта аз көрүлгән бирлик, иттипақлиқ шәкилләнгән.

Америка кеңәш палатаси йеқинда мақуллиған истратегийәлик риқабәт қанун лайиһәси (SCA) дики мәзмунларниң көп қисми хитайға мунасивәтлик болуп, хитайниң иғвагәрчилики вә дуняни контрол қилиш ғәризидә елип бериватқан кеңәймичилик һәрикитини тосуш муһим нишан қилинған, һәтта бу сәвәбтин кәлгүсидә хитай билән тоқунуш йүз бериши мумкинликиму нәзәргә елинған.

Америка сиясәтчилири оттуриға қойған пикир вә тәдбирләр ичидә әң көзгә көрүнәрлик болғини американиң тәйвәнгә қаратқан сияситидики түп өзгириш болуп, америка гәрчә "бир хитай" пиринсипиға әмәл қилидиғанлиқини ейтип келиватқан болсиму, бу қетимлиқ қанун лайиһәсидә "тәйвәнни хитайдин айриветиш американиң муһим мәнпәәти" дейилгән. Демәк, бу қанун лайиһиси американиң 1979-йилдин бери йолға қоюп келиватқан, "хитай билән тәйвән мунасивитидә хитайға йол қоюш вә өзара тоқунушмаслиқ" сияситини бикар қилидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт