Гордон чаң: "хитай компартийәсигә ‹қан бериш' ни тохтитиш лазим!"

Мухбиримиз әзиз
2021-06-30
Share

Америка ахбаратлирида даим көзгә челиқидиған мустәқил анализчи гордон чаң 29-июн күни "қовуқташ институти" (Gatestone Institute) ниң торида елан қилинған обзор мақалиси арқилиқ америка башчилиқидики ғәрп дөләтлириниң хитай компартийәсигә техиму қаттиқ қол болуши лазимлиқини, шуниңдәк хитай компартийәсиниң уйғур мәҗбурий әмгики қатарлиқ вастилар арқилиқ "қан шораш" һәмдә өзини күчләндүришигә сүкүт қилмаслиқни алаһидә тәкитлигән.

Аптор "таҗисиман вирусини хитай һөкүмити қәстән тарқатқан" дегән қаришини йәнә бир қетим әскәртип, бу вирус түпәйлидин 600 миңдин артуқ америка пуқрасиниң һаятидин айрилғанлиқини, хитай һөкүмитиниң һәр йили аз дегәндиму йерим триллйон америка доллири қиммитидики әқлий мүлүкни оғрилап кетиватқанлиқини, шуниңдәк хитай һөкүмитиниң ашкара һалда "америкаға қарши хәлқ уруши" тәшвиқати қиливатқанлиқини оттуриға қойған.

Апторниң қаришичә, нөвәттә хитайниң иқтисадий "һалсирап қеливатқан" һаләттә болуп, зор дәриҗидә америка базириға тайинип қалмақта икән. Йәнә келип хитай һөкүмити һазир зор дәриҗидә екиспорт қилишқа муһтаҗ икән. Бундақ әһвалда америка һөкүмити уйғурларниң мәҗбурий әмгики бәдилигә меңиватқан тәминат зәнҗириниң америка базириға сиңип киришигә қәтий қарши туруши, хитай һөкүмитиниң бу арқилиқ өзиниң һалакәткә йүзлиниватқан аҗиз гәвдисигә "қан толуқливелиши" ға йол қоймаслиқи лазим икән. Болупму Nike, Apple қатарлиқлар вастилик һалда уйғурларниң мәҗбурий әмгикидин пайдилиниватқан һәмдә буниңға хатимә беришни рәт қиливатқан әһвалда, америка һөкүмити җәзмән буниңға қарши техиму үнүмлүк чариләрни тепип чиқиши лазим икән.

Аптор ахирида хуласә тәриқисидә "хитай һөкүмити америка үчүн шунчә көп тәһдитләрни пәйда қиливатқанда, бу хил дүшмәнликкә тақабил турушниң әң яхши чариси хитай билән болидиған сода алақисини пүтүнләй кесип ташлаш," дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт