Xitaygha taqabil turushta amérika we yaponiye soda diplomatiyesini yolgha qoymaqchi

Xitayning barghanséri éship bériwatqan tehditlirige taqabil turush üchün amérika bilen yaponiye otturisidiki hemkarliqning bundin kéyin soda diplomatiyesi sheklide dawam qilidighanliqi melum bolmaqta.

Roytérs agéntliqining 1-awghusttiki xewiride éytilishiche, özek (chip), bataréye we énérgiye nöwette amérika bilen yaponiye otturisidiki yéngi hemkarliqning eng tüp témiliri bolup, bu jehettiki teminlesh zenjiride xitaygha tayinip qalmasliq yaki bu xil tayinip qélishni eng töwen derijige chüshürüsh buningdiki axirqi meqset iken. 29-Iyul küni ikki terep imzalighan qoshma bayanatta bu mesile alahide orun alghan.

Amérika qoshma shtatlirining yaponiyege ewetilgen bash elchisi ram émanyul (Rahm Emanuel) 2022-yilining béshida wezipige olturghandin buyan mushu xil “Soda diplomatiyesi” ni tekitlep kéliwatqan bolup, buning iqtisadiy bixeterlik üchün muhimliqini köp qétim otturigha qoyghan. Netijide yéqinda amérika shirketliri kelgüsidiki özek ishlepchiqirish zawutlirini yaponiyege qurushqa teyyarliq körmektiken. Bu heqte söz bolghanda bash elchi ram “Soda diplomatiyesi amérika bilen yaponiye otturisidiki iqtisadiy hemkarliqni we maslishishni emelge ashurushtiki muhim qedem” dégen. Buninggha jawaben “Tésla” (Tesla) shirkitini bataréye bilen teminleshni üstige alghan “Panasonik” (Panasonic) shirkiti yéngi bataréye zawutini kanzas shtatigha qurush heqqide qarar alghan.

Melum bolushiche bu xildiki iqtisadiy hemkarliq xitayning iqtisadiy quwwitini destek qilip siyasiy jehettiki üstünlükni qolgha keltürüshni közlewatqan zomigerlikige qaqshatquch zerbe bolidiken.