Amérika dölet mejlisining yazliq tetildin kéyinki xizmiti xitaygha taqabil turushqa qaritilghan

Birleshme agéntliqining xewer qilishiche, nöwette amérika palata ezaliri xitay hökümitige taqabil turushni nishan qilghan bir qatar tedbirlerni küntertipke qoymaqta iken. Nöwette, amérika xitayni özining eng chong siyasi jughrapiyelik reqibi, dep qarawatqan bolup, maqullinidighan bu qanun-tedbirler amérika hökümitining xitay üstidin ghalip kélishige képillik qilidu, dep qaralmaqta iken. Birleshme agéntliqining 8-séntebirdiki xewiridin qarighanda amérika-xitay istratégiyelik riqabet pewqul'adde komitétining re'isi jon mulénar bu qanunlarda “Xitay kompartiyesining herbiy, iqtisadi we idé'ologiye jehettiki tehditlirige qarshi ünümlük tedbirler élinidu” dégen.

Jon mulénarning qeyt qilishiche, “Bu riqabette ghelibe qilish her ikki partiyesining nishani” iken. Amérika dölet mejlisining yazliq tetildin kéyinki xizmet nishanining asasi nuqtisini xitaygha qaritishi, aq sarayning dölet xewpsizlik meslihetchisi jek suliwan béyjingni ziyaret qilip, xitay rehbiri shi jinping bilen körüshüshining arqisidinla bashlan'ghan. Birleshme agéntliqining qeyt qilishiche, amérika dölet mejlisining xitaygha munasiwetlik bu qanun layiheliri xitay bi'o-téxnika shirketlirige tayinishini azaytish, xitayning tokluq aptomobil we ademsiz uchqulirini cheklesh, xitay puqralirining amérikida déhqanchiliq meydani sétiwélishini men'i qilish, éksport cheklimilirini kücheytish, amérika eqliy mülük sahesige qaritilghan jasusluq heriketlirini yoqitish pirogrammisini eslige keltürüsh qatarliqlarni öz ichige alidiken.

Amérika-xitay istratégiyelik riqabet pewqul'adde komitétining ezaliri téxi yéqindila amérika yémeklik we dora bashqurush idarisidin amérika shirketlirining xitay bi'o-téxnika shirketliri bilen hemkarliship, Uyghurlarni kilinikiliq sinaq nishani qilishigha qarita tekshürüsh élip bérishni telep qilghanidi. Birleshme agéntliqining qeyt qilishiche, awam palatasi qanun layihelirining biride, xitayning BGI namliq gén shirkiti tilgha élin'ghan. Bu shirket ilgiri xitayning Uyghurlarni basturushta gén sanliq melumatliridin paydilinishigha yardem bérish bilen eyiblen'genidi.