Америка, әнгилийә вә австиралийә хитайға қарши бирликсәп қурған

Мухбиримиз ирадә
2021-09-16
Share

Америка һөкүмити әнгилийә вә авистиралийә билән йеңи үч тәрәплик бихәтәрлик шериклик мунасивити орнатқанлиқини җакарлиди. Мәзкур бирликсәп бу үч дөләтниң хитайға тақабил туруш иқтидарини күчәйтидикән.

CNN Теливизийәси бу һәқтики хәвиридә юқириқи бу үч дөләт һәмкарлиқини "хитайға қарши қурулған қорған" дәп атиған. Бу һәмкарлиқ келишими бойичә америка австралийәниң ядро енергийәлик су асти парахоти ясап чиқишиға ярдәм қилидикән.

Мәзкур һәмкарлиқ келишими 15-сентәбир чаршәнбә күни америка президенти җов байден, әнгилийә баш вәзири борис җонсон вә авистиралийә баш министири скот моррисон бирликтә өткүзгән син йиғини билән елан қилинған. Җов байден йиғиндики сөзидә бейҗиңниң исмини очуқ тилға алмиған, бирақ австралийәниң ядро ениргийәлик су асти парахотиға игә болуши һәққидә тохталғанда: "дөләтләр тез тәрәққий қиливатқан тәһдитләрдин мудапийәлиниш үчүн әң яхши техникиларға игә болуши керәк," дегән.

У йәнә мундақ дегән: "бизниң хәлқлиримиз 100 йилдин көпрәк вақиттин буян мүрини-мүригә тирәп биллә туруп кәлди. Бүгүн биз һәмкарлиқни чоңқурлаштуруш вә рәсмийләштүрүш үчүн йәнә бир тарихий қәдәм ташлаватимиз. . . Чүнки һәммимиз һинди-тенч окянниң тинчлиқи вә муқимлиқиға капаләтлик қилишниң зөрүрлүкини тонуп йәттуқ".

CNN Теливизийәсиниң билдүрүшичә, австралийәгә қураштурулуп берилидиған һәрбий парахотлар австиралийә деңиз армийәсиниң иқтидарини, болупму униң җәнубий деңиздики һәрикәт иқтидарини зор дәриҗидә ашуридикән. Улар йәнә тор бихәтәрлики, сүний әқил вә кивантум компутер техникиси тәрәққияти қатарлиқ саһәләрдики һәмкарлиқниму илгири сүридикән.

Хитайниң вашингитондики баш әлчиханиси 15-сентәбир күни дәрһал бу бирликсәпкә наразилиқ билдүргән. Әлчихана баянатчиси лю пеңю америка, әнгилийә вә австралийәни тәнқидләп: "улар өзлириниң соғуқ уруш роһий һалити вә идийиви җәһәттики бир тәрәплимә қаришини йоқитиши керәк," дегән.

Мәлум болушичә, мәзкур һәмкарлиқ қарари америка президенти җов байден келәр һәптә "4 дөләт бихәтәрлик һәмкарлиқи йиғини" бойичә японийә, һиндистан вә австралийә рәһбәрлирини тунҗи қетим йүзму-йүз күтивелиштин бир һәптә бурун елан қилинған. "4 дөләт бихәтәрлик һәмкарлиқи" му хитай тәһдитигә қарши қурулған бирликсәп иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт