Америка мәтбуатлирида американиң хитайға давамлиқ ярдәм қилмаслиқи тәкитләнмәктә

Мухбиримиз ирадә
2021.12.30
Share on WhatsApp
Share on WhatsApp

Америкада хитайниң барғансери мустәбитлишиватқан һакимийити һәққидики тонушниң артишиға әгишип, американи хитай билән илгирикидәк мунасивәт орнитишни аяқлаштуруш һәққидики чақириқларму күчәймәктә.

Америкадики нопузлуқ жорналлардин “вал-ситрит жорнили” гезитидә елан қилинған “америка әмди хитайға ярдәм қилмаслиқи керәк” мавзулуқ көз қараш мақалисида дәл шундақ идийә алға сүрүлгән. Мақалида мундақ дейилгән:

“көп йиллардин буян, америка хитайға алаһидә муамилә қилип, униң дуня сода тәшкилатиға әза болушиға ярдәм қилди вә бу арқилиқ хитайниң өз тиҗаритини зор дәриҗидә кеңәйтишигә ярдәм бәрди. Биз хитай армийәсини тәрбийәләшкә ярдәм бәрдуқ, икки әвлад инженер вә алимлирини тәрбийәләп бәрдуқ. Хитайниң һазир бизниң дүшминимизгә айланғанлиқини нәзәрдә тутқанда, илгирики сиясәтләрниң толиму әхмәқлиқ икәнликини көримиз. Мундақчә ейтқанда, биз бизни йемәкчи болған ейиқни өз қолимиз билән бақтуқ.”

Мақалидә хитайниң кеңийиватқан ташқий сиясити, заманиви армийәси билән америка үчүн җиддий бир тәһдиткә айланғанлиқи, 2022-йили американиң күч тәңпуңлуқини өзигә пайдилиқ тәрәпкә буруши керәклики, хитайниң һазирқи чекиниватқан иқтисадиниң буниң үчүн бир пайдилиқ амил болуши мумкинлики баян қилинған.

“вал-ситрит жорнили” гезитидә елан қилинған “хитай иқтисадиниң аста ериши” намлиқ йәнә бир мақалидә чүшәндүрүлүшичә, хитайниң иқтисади һазир аста характирлиқ иқтисадий кризисни баштин кәчүрүватқан болуп, бу һазирқи һакимийәтниң муқимлиқиға вә дуня иқтисадиға еғир сәлбий ақивәтләрни елип келиши мумкин икән.

Мақалә аптори томас дустербергниң көрситишичә, нурғун агаһландуруш аламәтлиригә қаримай, ғәрб анализчилири вә тәдбир бәлгилигүчиләр ши җинпиңни бу кризисни контрол қилалайду, дәп қарап, үмидвар позитсийәдә болмақтикән. Бирақ аптор бу үмидварлиқни “хата” дәп баһалиған вә “америка вә униң иттипақдаш дөләтлири орунсиз үмидварлиққа берилмәй, әксичә хитай иқтисадидики чөкүш елип келидиған ақивәтни тоғра мөлчәрлиши, униң өз иқтисадиға елип келидиған сәлбий тәсирини азайтишқа һәрикәт қилиши керәк,” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.