Уйғур ели хитай өлкилирини ток билән тәминләйдиған әң чоң “еликтир истансиси” ға айланған

Хитайниң 2010-йиллардин башлап “ғәрбниң токини шәрққә йөткәш” истиратегийәси йолға қоюлуп 12 йилдин кейин, уйғур ели хитай ‍өлкилирини ток билән тәминләйдиған әң чоң “електир истансиси” ға айланған. Хитай таратқулириниң 4-ноябир бәргән хәвәрлиридин мәлум болушичә, бу йил 31-өктәбиргичә болған 11 ай ичидә уйғур елидин хитай өлкилиригә йөткигән омумий електир токи миқдари 103 милярт 662 милйон киловатқа йетип барған. “хитай хәвәрлири” ториниң бу һәқтики хәвиридә дейилишичә, 11 ай ичидә уйғур елидин ичкиригә йолланған ток записи бир милярд 400 милйон хитай аһалисиниң 32 күн ишлитишигә йетидикән.

Хәвәрдә буниң “пүтүн мәмликәтни ток билән тәминләшкә капаләтлик қилиш омуми вәзийитигә хизмәт қилғанлиқи” тәкитләнгән. Мәлум болушичә, “ғәрбниң токини шәрққә йөткәш” пиланидики електир истансисилириниң мутләқ көп қисми көмүр електир истансиси болуп, муһитни қоғдиғучилар бунчилик көп ток ишләпчиқиришта сәрп қилинидиған көмүр сәрпияти районниң әзәлдинла назук болған һава, су вә екеологийәлик муһитини техиму еғир бузғунчилиққа учритидиғанлиқини агаһландуруп кәлгән иди.

Хитай таратқулириниң билдүрүшичә, уйғур елидики көмүр електир истансисилириниң хитай ‍өлкилирини тәминлигән бир айлиқ електир токи хитай ‍өлкилиридә 3 милйон 150 миң тонна көмүрниң йеқилиши вә нурғун миқдардики карбон диоксид вә гүңгүрт төт оксид қатарлиқ зәһәрлик газниң һаваға қоюп берилишиниң алдини алидикән.

Хитай һөкүмити илгири көмүр електир истансисилирини қәдәм басқучлиқ азайтип, 2030-йилиға қәдәр зәһәрлик карбун газини контрол қилишни әң юқири чәккә йәткүзидиғанлиқи, 2060-йили нөлгә чүшүрүшни вәдә қилған болсиму, бирақ бу йилниң башлирида техиму көп көмүр електир истансиси қурушни тәстиқлиған.