Da'iriler peyziwat nahiyisidin yene 3000 yashni xitay ölkilirige yötkimekchi

Xitay da'iriliri Uyghur élining jenubidiki nahiyilerdin éshincha emgek küchlirini yötkesh namida, Uyghur yashlirini xitay ölkilirige yötkeshni dawamlashturmaqta.

Xitayning shinxu'a torining 5-noyabirdiki xewiridin melum bolushiche, da'iriler bu yil 2-noyabirdin bashlap qeshqer peyziwat nahiyisidiki Uyghur yashliridin 3000 nepirini 3 türkümge bölüp, 3 ayliq terbiyilesh kursida terbiyilep, andin xitay ölkiliridiki zawutlargha ewetidighanliqini qarar qilghan.

Xewerde déyilishiche, 1-türkümdiki terbiyilesh kursigha tallan'ghanlar 16 yashtin 25 yashqiche bolghan yashlar bolup, ular peyziwat nahiyisidiki 13 yéza, kenttin toplap kélin'gen.

Da'iriler yéqinqi nechche yildin buyan, Uyghur éligha köchüridighan xitaylarni köpeytish bilen bille, Uyghur élidin türküm-türkümlep yashlarni xitay ölkilirige yötkeshni jiddiyleshtürgen. Bu ehwal Uyghurlarning naraziliqini qozghapla qalmay, xelq'aradiki kishilik hoquq teshkilatliri we Uyghur teshkilatliri teripidin Uyghur nopusini shalanglashturup, Uyghurlargha qaritilghan assimilyatsiyini kücheytish siyasiti dep eyiblenmekte.