Xitaygha omumyüzlük zerbe bérish amérika dölet mejlisi ezalirining ortaq arzusigha aylan'ghan

Xitayning dunyawi tehditi yildin yilgha éship bériwatqan we xitay bu tuyuq yoldin yanmaywatqan weziyette amérika dölet mejlis ezaliri xitaygha omumyüzlük zerbe bérishning texirsizlikini tonup yetken.

Roytrés agéntliqining xewer qilishiche, dölet mejlisidiki démokratlar we jumhuriyetchiler bir nechche hepte söhbetliship, amérikaning xitaygha taqabil turush iqtidarini kücheytishke da'ir qanun layihilirini muzakire qilghan we bu qanun charshenbe küni maqullinidiken.

Amérika kéngesh palatasi tashqi munasiwet komitéti ezaliri “2021-Yilliq istratégiyelik riqabet qanuni” toghruluq muzakirileshken hemde uning tüzitilgen layihesinimu oylashqan. Amérika dölet mejlisidiki démokratlargha yardemchi bolup ishlewatqan bir xadimning muxbirgha bildürüshiche, her ikki partiyedin bolghan dölet mejlisi ezaliri xitay we hindi-tinch okyan rayoni mesiliside yuqiri derijide birlikke kelgen. Tashqi munasiwet komitét ezaliri yene dölet mejlisige 150 nusxa tüzitilgen qanun layihesi sun'ghan. Mezkur layihe kéngesh palata ezasi chak shumér bu yil 2-ayda élan qilghan “Téz yol” layihesining bir qismi bolup, uningda xitaygha qarshi turushqa munasiwetlik bir qatar maddilar orun alghan.

Roytrés agéntliqi 8-aprél 280 betlik qanun layihesining bezi tepsilatlirini ashkarilighan bolup, bular xitay bilen bolidighan iqtisadiy riqabet, insanperwerlik, démokratik qimmet qarash, mesilen Uyghurlargha yürgüzülüwatqan irqiy qirghinchiliqni cheklesh üchün uninggha jaza yürgüzüsh, xongkongdiki démokratiye herikitini qollash qatarliqlarni öz ichige alidiken.