Хитай һөкүмити уйғур пәрзәнтлирини хитайлаштуруш маарипиниң көлимини ғайәт зор кеңәйткән

Хитай һөкүмити йиллардин бери уйғур пәрзәнтлирини хитайчә тәрбийәләйдиған йәсли, башланғуч вә оттура мәктәпләргә ғайәт зор мәбләғ салған болуп, миллий ассимилатсийә қәдимини балилардин башлаш, уларни тамамән хитайчә маарипта тәрбийәләш қурулушиниң көлимини һәссиләп кеңәйткән.

Хитайниң “шинхуа тори” да бәргән хәвиригә қариғанда, уйғур районидики мәктәпләрдә оқуйдиған миллий оқуғучилар сани 2015-йил 3 милйон 280 миң болған болса, 2020-йил 4 милйон 845 миңға йәткән. Уйғур райониниң йәсли вә 9 йиллиқ мәҗбурий маарип мәктәплири билән қаплиниш нисбити хитайдики оттуричә сәвийәдинму юқири болған.

Йеқинқи йиллардин буян уйғур районидики һәр қайси йеза-кәнтләрдә 4000 дин көп йәсли қурулған. Хотәндики бир шәһәр үч наһийәдә йәслидин башлап толуқ оттурини пүттүргичә оқуйдиған 9 “маарип бағчиси” қурулған болуп, буниңға 2 милярд 800 милйон йүән мәбләғ селинған.

Наһайити рошәнки, хитай һөкүмити уйғур районидики йәсли вә мәктәпләрниң көлимини кеңәйтиш арқилиқ, уйғур тили вә мәдәнийитини тамамән йоқитиш һуҗумиға өткән. Радийомизниң илгири уйғур районидин ениқлашлириға қариғанда, хитайниң түрлүк усулларни қоллинип, уйғур балилирини миллий маариптин айриветиш вә хитайлаштуруш тактикисини йүргүзүп кәлгәнлики, аталмиш “қош тил” маарипи вә ятақлиқ мәктәпләр арқилиқ уйғур пәрзәнтлирини хитайлаштуруш қәдимини тезлитиватқанлиқи мәлум болғаниди.