"хитайлаштуруш" сиясити бундин кейинки "милләтләр хизмити" ниң асаси болмақчи

Мухбиримиз әзиз
2021-09-07
Share

Хитай һөкүмитиниң өткән бирнәччә йилда тәшвиқ қилип келиватқан "җуңхуа миллити ортақ гәвдиси кимлики чүшәнчисини мустәһкәмләш" чақириқи йеқинда рәсмий йосунда "қиблинамә" басқучиға көтүрүлди. "шинҗаң гезити" ниң 7-сентәбирдики хәвиридә ейтилишичә, уйғур аптоном районлуқ һөкүмәт буни рәсмий музакирә қилған һәмдә буни ашкара җакарлиған.

Хәвәрдә ейтилишичә, үрүмчидә ечилған "мәркәз миллий ишлар хизмити йиғини" ниң роһини өгиниш йиғинида "ши җинпиңниң мәркәз миллий ишлар хизмити йиғинида сөзлигән сөзини әстә мәһкәм сақлаш һәмдә җуңхуа миллити ортақ гәвдиси кимлики чүшәнчисини йеңи дәврдики милләтләр ишлири хизмитиниң мәркизий нуқтиси қилиш, шу арқилиқ шинҗаңда узун мәзгиллик әминлик бәрпа қилиш лазим" дегән хуласә чиқирилған. Шундақла ениқ қилип "җуңхуа миллити ортақ кимлики чүшәнчиси бәрпа қилиш бундин кейинки миллий ишлар хизмитиниң йетәкчи идийәси болиду" дәп көрситилгән.

Түрлүк учур мәнбәлири өткән бирнәччә йилда хитай һөкүмитиниң уйғур диярида уйғур миллий кимликини ипадә қилғучи барлиқ шәйиләрни йоқитиватқанлиқини намаян қилған иди. Әмдиликтә "хитайлаштуруш" мәнисидики "җуңхуа ортақ кимлики чүшәнчиси" ни миллий ишлар хизмитиниң йетәкчи идийәси қилиш һәққидики чақириқ буниң иҗра қилиш басқучиға өткәнликини көрсәткән. Техи йеқинда "коммунизм қурбанлири хатирә фонди" ниң тәтқиқатчиси доктур адрян зенз хитай һөкүмити үчүн мақалә йезиватқан бир қисим хитай "алимлири" ниң ашкара һалда "уйғурларниң җәнубий шинҗаң районидики нопус қурулмисида мутләқ үстүнлүкни игилиши нөвәттики террорлуқ һадисилириниң бир муһим мәнбәси. Буни түгитиш үчүн бу җайлардики хитай нопусиниң санини ашуруш лазим" дегәнликини көрсәткәниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт