Хитай һөкүмити уйғур йеза балилириниң хитай җиңҗү тиятири қатарлиқларни өгинишигә 17 милйон йүән мәбләғ салған

Мухбиримиз ирадә
2020-10-22
Share

Ақсу ахбарат тори учтурпан наһийәсиниң имамлирим базирида уйғур балилирини хитай тили вә мәдәнийити бойичә тәрбийәләштә башчи болуп хитайниң тәқдирлишигә еришкән қурбан ниязниң бу йилму мәмликәтлик әмгәк нәмуничиси болуп сайланғанлиқи һәққидә тарқатқан бир хәвиридә хитай мәркизи һөкүмитиниң уйғур йеза балилириға хитайчә мәдәнийәт сиңдүрүшкә 17 милйон йүән мәбләғ салғанлиқини ашкарилиған. Униңда мунулар дейилгән:

"2003-йили, қурбан нияз 600 миң йүәндин көпрәк мәбләғ ғәмләп, юрти  учтурпан наһийәсиниң имамлирим базирида дөләт ортақ тили башланғуч мәктипи қурған. 17 Йилдин буян, у маарип арқилиқ юртиниң намрат, қалақ қияпитини өзгәрткән, бу мәктәптики балиларму дөләт ортақ тил  йезиқини пишшиқ игиләп һәм җуңхуаниң мунәввәр әнәниви мәдәнийитини яхши өгинип, тәқдирини өзгәрткән. Бүгүнки күндә, дөләт мәдәнийити бу йеза  кәнт башланғуч мәктипиниң зөрүр дәрсликигә айланди. Дөләт 17 милйон йүән мәбләғ селип йеңидин қурған синипларға җуңхуа мәдәнийити тоғрисидики рәсимләрни асти. ‹Хуа мулән', ‹хуңдеңҗи', ‹шаҗябаң'. . . Қатарлиқ хенән тиятири, бейҗиң тиятириниң килассик бөләклирини һәммә оқуғучи ейталайдиған болди".

Хәвәрдә йәнә қурбан ниязниң сөзи нәқил кәлтүрүлуп туруп "өгинишни чоқум балилардин башлап тутишимиз керәк, кичик вақтида каллисида сақливалған нәрсиләр бир адәмниң пүткүл һаятиға тәсир көрситиду. Шуңа мән балиларниң каллиси әң сап вақтида сап нәрсиләрни қобул қилғуздум, һәрқайси милләтләр бир аилә кишилири, биз җуңхуа миллити ортақ гәвдиси еңини мустәһкәмлишимиз керәк" дегәнләр баян қилинған.

Хитай даирилириниң уйғур елидә хитай мәдәнийитини сиңдүрүшни омумйүзлүк күчәйтиватқан болуп, ақсу ахбарат тори елан қилған йәнә бир хәвәрдин қариғанда, ақсу вилайити билән хитайниң җеҗяң өлкиси йеқинда "җеҗяң  ақсу мәдәнийәт алмаштуруш, һәмкарлишиш" қурулуши дәйдиған бир һәрикәт башлиғаникән. Хәвәрдә бу һәқтә мунулар деийилгән: "мән җеҗяң, шинҗаңни сөйимән темисидики бу қурулуш мәркәзниң 3-нөвәтлик шинҗаң хизмити сөһбәт йиғининиң роһини әмәлийләштүрүп, шинҗаңни мәдәнийәт арқилиқ озуқландуруш қурулушини чоңқур алға силҗитишни мәқсәт қилиду". Буниңда ақсу билән җеҗяңниң өзара мәдәнийәт алақилирини техиму күчәйтиш, йәни гүзәл сәнәт, мәдәнийәт ядикарлиқлири, кутупхана, оюн қоюш, музика қатарлиқ саһәләрдики 10 орун һәмкарлишиши, җеҗяң билән ақсудики һәр милләт кадир-амминиң кәң алақилишиши, омумйүзлүк алмаштуруши қарар қилинған. Мәлум болушичә, һазир уйғур аммисиға қарита хитай тили өгитиш, хитай мәдәнийитини тәрғиб қилиш, һәтта чаған қатарлиқ хитай миллий байримини өткүзүш, хитайчә кийиниш, өйлиригә хитайчә мәснәвиләрни есиш вә башқилар кәң омумлаштурулуватқан болуп, ақсудики хитай даирилири бу җәһәттә әң актип һәрикәт қилмақтикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт