Хитай даирилири хотәндә хитай мәдәнийитини тәшәббус қилидиған 1 институт 3 тәтқиқат мәркизи қурған

Вашингтондин мухбиримиз ирадә тәйярлиди
2023.10.26

Хитай даирилири хотәндә “удун тәтқиқат институти” вә “куинлун мәдәнийити тәтқиқат мәркизи”, “хитай қаштеши мәдәнийити тәтқиқат мәркизи” һәмдә “хотән буддизм мәдәнийити тәтқиқат мәркизи” қатарлиқ орунларниң ечилиш мурасимини қилған.

Хотәндики 1 институт вә 3 тәтқиқат мәркизиниң ечилиш мурасими 26-өктәбир күни өткүзүлгән. Хитай хәвәрләр тори бу һәқтики хәвиридә, бу тәтқиқат орунлириниң “хотәнниң җуңхуа мәдәнийити билән озуқлиниш хизмитини техиму үнүмлүк қилип, хотәнликләрниң мәниви мәдәнийитини һаятий күчкә игә қилидиғанлиқи” ни баян қилған.

Хитай һөкүмитиниң уйғурлар әң зич олтурақлашқан вә уйғур мәдәнийитиниң вәкиллик райони болған хотәндә аталмиш хитай мәдәнийитини әкс әттүридиған вә уни күчәйтишни тәшәббус қилидиған орунларни тәсис қилиши күчлүк диққәт қозғиди. Хитай даирилири йеқинқи йиллардин бери уйғур елида күчлүк йосунда елип бериватқан хитайлаштуруш сияситини “шинҗаңни мәдәнийәт билән озуқландуруш”, “җуңхуа миллити ортақ гәвдиси еңи” дегәндәк намлар билән йүргүзүп келиватқан иди.

Хотән вилайәтлик парткомниң секретари лю чен ечилиш мурасимидики сөзидә “хотән куинлун мәдәнийитиниң җуңхуа мәдәнийитидики толдурғусиз орнини җари қилдуриду, тәшәббускарлиқ билән ‛куинлун мәдәнийити, хитай қаштеши мәдәнийити вә хотән будда дини мәдәнийити‚ дин ибарәт үч байрақни көтүрүп хотәнни мәдәнийәт билән озуқландуриду” дәп сөз қилиш арқилиқ хитай һөкүмитиниң хотәндики ассимилятсийә сиясәтлириниң қаттиқ күчийидиғанлиқидин шәпә бәргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.