Amérika awam palatasining alahide komitéti xitayning eng chong gén tetqiqat orni bolghan BGI ni chekleshni telep qildi
2024.01.26
Amérika awam palatasining xitay istiratégiyelik riqabet alahide komitétining ikki mes'uli xitayning eng chong gén tetqiqat orni BGI ni öz ichige alghan xitay bi'o-téxnika shirketlirining amérikada soda qilishni cheklesh qanun layihesi sun'ghan. BGI Shirkiti Uyghurlarning gén uchurlirini toplap, xitay hökümitining Uyghurlarni basturushigha yardemlishish bilen eyiblinip kelgen idi. Shu sewebtin amérika soda ministirliqi BGI ning bezi tarmaq shirketlirini qara tizimlikke kirgüzgen idi. Melum bolushiche, BGI Uyghurlarning gén uchurlirini toplash bilenla eyiblinip qalmighan. Bu xitay shirkiti yene amérika istixbarat emeldarliri teripidin amérika gén uchurlirini toplash, yighilghan uchurlarni melum topni nishan qilghan bi'ologiyelik qorallarni ishlepchiqirishta ishlitish mumkinchiliki bilenmu agahlandurulghan idi.
Amérika awam palatasi xitay istiratégiyelik riqabet alahide komitétining 25-yanwar élan qilghan bayanatida, bu komitétning re'isi mayk gallagér bilen komitétning mes'ul ezasi raja krishnamurti sun'ghan bu qanan layihesi, amérikagha düshmen bolghan chet el bi'o-téxnika shirketlirining amérika bazirigha kirishini chekleydighanliqini bildürgen. Melum bolushiche, bu qanan layihesi maqullansa, amérika dawalash mulazimiti sahesining BGI ni öz ichige alghan chet ellik reqib shirketler bilen soda qilishini chekleydiken. Bayanatta, komitét re'isi mayk gallagér mundaq dégen: “Béyjing gén instituti yeni (BGI) amérikaliqlarning gén sanliq melumatini toplap, uni xitay armiyisining tetqiqatida ishletmekte. Shübhisizki, xitay kompartiyesi BGI ning toplighan gén sanliq melumatini ishlitip, özining yaman gherizini ishqa ashurushi, hetta amérika xelqini nishan qilghan bi'ologiyelik qoralni tereqqiy qildurushi mumkin.”
Bayanatta yene awam palata ezasi nél dun, “Béyjing gén institutigha oxshash shirketler xitay kompartiyesi bilen zich hemkarliship, chet el gén sanliq melumatlirini qanunsiz toplimaqta. Bu Uyghur xelqige oxshash xitayda ziyankeshlikke uchrash mumkinliki zor bolghan az sanliq milletlerning génlirini tekshürüp-tetqiq qilishnimu öz ichige alidu” dégen. Melum bolushiche, mezkur qanun layihesi amérika kéngesh palatasidimu bil xagérti, geriy pétérs qatarliq palata ezaliri teripidin otturigha qoyulghan.