Amérika maliye ministirliqi yene bir türküm xitay emeldarliri we shirketlirige jaza élan qildi

Amérika maliye ministirliqi 31-iyul küni “Yer shari magénti'iski qanuni” ning mezmunigha bina'en Uyghur diyaridiki zulum we bashqa heqler depsendichilikige biwasite chétishliq dep qaralghan yene bir qisim xitay emeldarlirigha we mu'essesige jaza élan qildi.

Ministirliqning tor bétide élan qilin'ghan xewerde éytilishiche, bu qétim “Shinjang ishlepchiqirish we qurulush bingtu'eni” resmiy halda ministirliqning “Qara tizimliki” ge kirgüzülgen. Shuning bilen birge “Bingtu'en” ning sabiq siyasiy komissari we partiye sékrétari sun jinlong hem “Bingtu'en” ning bash qomandani, mu'awin partkom sékrétari péng jyaruy Uyghur diyaridiki qanunsiz bolghan zor kölemlik tutqun we bashqa jismaniy qiynaqlargha biwasite chétishliq, dégen eyib bilen bu “Qara tizimlik” ke qoshulghan. Maliye ministiri stiwén minushin bu heqte toxtilip: “Ilgiri dep ötkinimizdek amérika qoshma shtatliri shinjangda we pütün dunyada kishilik heqlerge buzghunchiliq qilghuchilarni jawabkarliqqa tartish üchün özining iqtisadiy imkaniyetliridin toluq paydilinishqa teyyar” dédi.

Melum bolushiche, bu qétimqi heriket toghrisida mexsus ijra'iye buyruqi chüshürülgen bolup, uningda “Yershari magéntiski qanuni” ning mezmunliri asas qilin'ghanliqi alahide tekitlinidu. Buningdin ilgiri amérika tashqi ishlar ministirliqi, amérika maliye ministirliqi, amérika soda ministirliqi, amérika dölet bixeterlik ministirliqi Uyghurlar duch kéliwatqan türlük basturushlargha qarshi inkas süpitide türlük jaza maddilirini élan qilghanidi. Bu qétimqisi shu türlerning eng yéngisi bolup, “Bingtu'en” ning tunji qétim “Qara tizimlik” ke élinishi iken.

Melum bolushiche, bu qétim “Qara tizimlik” ke kirgüzülgen sun jinlong “Hakimiyet ichidiki hakimiyet” déyiliwatqan “Bingtu'en” ning birinchi qol rehbiri bolghan bolup, nöwette xitay xelq jumhuriyiti ékologiye we muhit ministirliqi partguruppisining bash sékrétari, yeni ministir derijisidiki kadir iken. Nöwette “Bingtu'en” ning bash qomandani bolup ishlewatqan péng jyaruy bolsa qoshumche Uyghur aptonom rayonluq hökümetning mu'awin re'isi iken.