“шинҗаң вәкилләр өмики”ниң баянатчиси: “шинҗаңға мәбләғ селиш — хитайниң келәчиликигә мәбләғ селиштур”

Хитай компартийәсиниң 20 -қурултийиға уйғур аптоном райони намидин қатнишиватқан “шинҗаң вәкиллири”ниң баянатчиси җаң чүнлин, хитайниң уйғур районида буниңдин кейин йүргүзидиған сияситиниң йөлинишидин бишарәт бәргән. Униң ейтишичә, “шинҗаңға мәбләғ селиш хитайниң келәчикигә мәбләғ селиш” һесаплинидикән.

Чәт әлдики уйғур ели вәзийитини йеқиндин көзитиватқан анализчилар, хитай компартийәсиниң 20-қурултийиға қатнишиватқан аталмиш “шинҗаң вәкилләр өмики” баянатчисиниң сөзи, хитайниң кәлгүси тәрәққиятиниң давамлиқ уйғур елини “ечиш”қа мәркәзлишидиғанлиқи, шундақла уйғурларни хитай карханилириниң әрзан баһалиқ мәҗбурий әмгәк күчлиригә айландурушни давамлаштуридиғанлиқидин дерәк беридиғанлиқини билдүрмәктә.

“хитай хәвәрлири” ториниң ейтишичә, хитай компартийәсиниң 20-қурултийиға қатнишиватқан аталмиш “шинҗаң вәкилләр өмики”ниң баянатчиси, уйғур аптоном районлуқ парткомниң муавин секритари, тәшвиқат бөлүминиң башлиқи җаң чүнлин, 20-өктәбир бейҗиңда хитай таратқулириниң соаллириға җаваб бәргән. У мухбирларни күтивелиш йиғинида, хитайниң уйғур елида йеқинқи 10 йилдин бери йәсли маарипи қурулуши, уйғурларни ешинчә әмгәк күчи намида хитай карханилириға орунлаштуруш, кәнтләрни көчүрүш қатарлиқ җәһәтләрдә еришкән “утуқлири”ни баян қилип өткән, андин “шинҗаңға мәбләғ селиш — хитайниң келәчикигә мәбләғ селиштур” дәп көрсәткән.

Җаң чүнлинниң ейтишичә, уйғур елида йеқинқи 10 йил ичидә 6353 йәсли қурулған, 2 милйон 380 миң 530 йүрүш капаләт характерлик өй селинип, 2 милйон 360 миң 980 аилә, 10 милйондин артуқ киши көчүрүлгән.

У йәнә 3666 намрат кәнт вә 3 милйон 60 миң 49 нәпәр намрат нупусниң һәммиси намратлиқтин қутулғанлиқи, деһқан -чарвичиларниң ишик алдидики микро завутларға вә санаәт бағчилирида ишқа орунлишиши әмәлгә ашқанлиқини ейтқан. Һалбуки, лагердин қоюп берилгәндин кейин чәт әлгә чиқишқа мувәппәқ болған лагер шаһитлириниң ейтишичә, җаң чүнлин тилға алған “ишик алдидики микро завутлар” вә санаәт бағчилири әмәлийәттә хитай хусусий ширкәтлириниң мәҗбурий әмгәк карханилири икән.