Хитай кишилик һоқуқ доклати елан қилип америкини әйибләшкә урунған

Мухбиримиз ирадә
2018.04.24

Хитайниң кишилик һоқуқни әң еғир дәпсәндә қилғучи дөләтләрниң бири икәнлики көрситилгән бир пәйттә, хитай даирилири өз алдиған бир кишилик һоқуқ доклати елан қилип, америкиниң кишилик һоқуқ хатирисини әйибләшкә урунған.

Америка дөләт ишлири министирлиқи җүмә күни елан қилған 2017-йиллиқ кишилик һоқуқ доклатида, хитайни дуняда кишилик һоқуқни әң еғир дәпсәндә қиливатқан дөләтләрниң бири, дәп көрсәткән. Доклатта, уйғур мәсилиси көп йәрдә тилға елинған. Хитай һөкүмитиниң уйғурларниң миллий, диний вә ана тил һоқуқини қаттиқ дәпсәндә қилип, “хитайлаштуруш” сиясити иҗра қиливатқанлиқи билдүрүлгән.

Хитайниң “йәр шари вақит гезити” америкиниң кишилик һоқуқ доклатиға қарши баш мақалә елан қилип, америкини қәстән қусур издәш вә кишилик һоқуқни сиясийлаштуруш билән әйиблигән һәмдә уйғур елидә кишиләрниң муқим вә бәхтияр яшаватқанлиқини илгири сүргән.
Шинхуа агентлиқиниң хәвиридин қариғанда, хитай даирилири өзидики негизлик кишилик һоқуқ мәсилилирини тән елишниң орниға америкиға қариши бир доклат елан қилип, америкиниң өткән бир йиллиқ кишилик һоқуқ хатирисидики нуқсанларни тепип чиқишқа, шу арқилиқ америкини тәнқид қилишқа урунған.

Хитайниң дөләт ишлири кабинети елан қилған доклатта өткән бир йил ичидә америкида бай-кәмбәғәллик арисидики пәрқ техиму зорийип, өй-макансиз кишиләрниң сани өрлигәнлики, америкиниң сәһийә-суғурта хизмәтлириниң интайин начарлиқи илгири сүрүлгән. 

Әмма доклатта, америкида инсанларниң әң әқәллий һоқуқлири һесаблинидиған пикир, дин тил-йезиқ, учур-алақә, сайлаш-сайлиниш, тәшкиллиниш-намайиш қилиш қатарлиқ әркинликләрниң толуқ капаләткә игә қилинғанлиқи тилға елинмиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.