“хитайпәрәс” дәп тәнқидләнгән австралийә дөләт университетиниң профессори җейн галлей вәзиписидин истипа бәргән

Австралийә дөләтлик университетниң профессори, “хитай тәтқиқат мәркизи” ниң директори җейн галлей йеқинда өз вәзиписидин истипа бәргәнликини елан қилған. “австралийә пул-муамилә тәкшүрүши” гезитиниң 30-авғусттики санида ейтилишичә, профессор җейн галлей нөвәттә “дәм елиш” намида мәктәптин айрилған, әмма униң “хитай тәтқиқат мәркизи” ниң директорлуқ вәзиписини башқилар өткүзүвалған.

Мәлум болушичә, 2021-йилиниң бешида профессор җейн галлей уйғур дияридики зор тутқун һәққидә сөз қилип: “имзасиз бир парчә ‛илмий мақалә‚ гә асасланғанда, ‛бир милйон уйғур лагерға қамалған‚ дегән учурниң көптүрмә икәнлики” ни тәкитлигән. Шундақла “бу имзасиз мақалә ғәрб дунясидики ахбарат саһәсиниң уйғурлар һәққидики көплигән мәлуматлирини инкар қилиду” дегән. Әмма шуниңдин кейинла у ямғурдәк тәнқид вә ‍әйибләшләргә көмүлүп кәткән, шундақла кишиләрниң “хитайпәрәс сахта алим” дегәндәк һуҗумлириға учриған иди.

Хәвәрдә ейтилишичә, профессор җейн галлей “имзасиз мақалә” ни өзигә бәргән кишиниң австралийәниң хитайдики сабиқ баш әлчиси икәнликини ейтқан, әмма у кишиниң исмини ейтишни рәт қилған. У кейинчә бу һәқтә сөз қилип: “мән бу ‛имзасиз мақалә‚ ни германийәлик адрян зензниң уйғурлар һәққидики әсәрлиригә ‛җәң елан қилип бақса икән‚ дәп ойлиған. Әмма һәргизму униң әсәрлирини ‛рәт қилсикән‚ дәп ойлимиған,” дегән.

Нөвәттә университет рәһбәрлики униң истипа беришини “пүтүнләй шәхсий таллаш” дәп шәрһилигән болсиму, әмма униң дунявий тәнқид обйекти болуп қалғанлиқи буниңдики бир муһим сәвәб, дәп қаралмақта икән.