Xongkongdiki dangliq bay shaw jyenxu'a bayanatida özining tutqun qilin'ghanliqini ret qildi

Xongkong taratqulirining xewer qilishiche, 30-yanwar küni xitaydiki dangliq bay shaw jyenxu'a xitay saqchiliri we dölet bixeterlik xadimliridin teshkil tapqan 10 nechche kishi teripidin xongkongda tutqun qilinip xitaygha yalap élip kétilgen.

Bu heqtiki xewerlerde yene, shaw jyenxu'aning tutqun qilinishigha uning xitay re'isi shi jinpingni tenqidligenliki seweb bolghan bolushi mumkinliki tilgha élin'ghan idi. Emma 31-yanwar etigen shaw jyenxu'aning igidarchiliqidiki mingtyen hessidarliq shirkitining ündidar torida uning imzasida “Jem'iyetning manga köngül bölginige rehmet. Men hazir chet'elde dawaliniwatimen, hazirche ehwalim yaxshi. Mingtyen shirkitining barliq xizmetliri normal kétiwatidu!” dégen sözler yézilghan bayanat élan qilinip, xitay saqchiliri teripidin tutqun qilin'ghanliqi inkar qilin'ghan.

30-Yanwar shaw jyenxu'aning tutqun qilin'ghanliq xewiri tarqalghandin kéyin, xongkong saqchi da'iriliri 30-yanwar tün nispide deslep bayanat bérip, uning xongkongdiki a'ilisidikiler saqchilargha uning 30-yanwar bir bölüm kishiler teripidin chong quruqluqqa élip kétilgenlikini bildürgen bolsimu, emma shu küni kechte uning a'ilisidikilerning saqchigha qayta téléfon qilip, shaw jyenxu'aning saq-salamet ikenlikini uqturghanliqini, saqchilarning nöwette ehwalni dawamliq tekshürüwatqanliqini bildürgen.

Uchurlardin melum bolushiche, bu yil 45 yashqa kirgen shaw jyenxu'a,kanada puqrasi bolup, 89-yili béyjing tyen'enmén oqughuchilar démokratik herikiti mezgilide béyjing uniwérsitéti oqughuchilar uyushmisining re'isi bolghan we oqughuchilar bilen hökümet otturisida sülh qilishqa qatnashqan. Oqush püttürgendin kéyin soda ishlirigha kiriship, xitayning köp sandiki yuqiri derijilik hökümet emeldarliri bilen sodida menpe'etdarliq munasiwiti ornatqan. Shexsi bayliqi nechche yüz milyard xelq pulidin éship, xitayda aldinqi qatardiki baylar qatarigha ötken. Uchurlarda yene uning, yéqinqi yillarda xitay re'isi shi jinpinggha qarshi guruhtiki emeldarlar bilen qoyuq munasiwette bolghini üchün, xitay intizam tekshürüsh komitétining uning péyigha chüshkenliki qatarliq ehwallarmu tilgha élin'ghan.